Ўзбекистонлик собиқ футболчи Николай Ширшов вафот этгани ҳақидаги хабарлар 28 декабрь куни янгради.
Собиқ футболчининг ўлимига қон томирларидаги тромбнинг бехосдан ёрилиб кетиши сабаб бўлган. Бу ҳақида унинг ҳамкасби «DonDay.ru» сайтига хабар қилди.
Маълум бўлишча, Ширшов Ростов вилоятининг Новошахтинск шаҳрида истиқомат қилган ва мураббий сифатида фаолият юритган.
Николай Ширшов 1974 йилнинг 22 июнида Тошкент шаҳрида туғилган. Фаолиятини Тошкент вилоятининг «Сверловец» (1991 йил) клубида бошлаган Ширшов кейинчалик «Трактор» ва «Пахтакор» сафида тўп суради. У «шерлар» таркибида (1992—1999) 159 та расмий ўйинда майдонга тушиб, 16 та голга муаллиф қилган. Кейинчалик футболчи беш йил давомида (2000—2005) «Ростов» шарафини ҳимоя қилади.
Шунингдек, Ширшов Россиянинг «СКА», «Батайск-2007», «Таганрог», «МИТОС» ва «ТПФ» клубларида ҳам ўйнаган. Николай 2013 йилда футболчилик фаолиятини якунлаганди.
Ўзбекистон миллий терма жамоаси либосида (1996—2005) эса 64 та ўйинда қатнашиб, 13 та гол урган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!