Навоий шаҳрида 23 декабрь куни 4 нафар эгизак туғилди. «Kun.uz» мухбири чақалоқларнинг отаси билан суҳбатлашди.
Қайд этилишича, чақалоқларнинг 3 нафари қиз, бир нафари ўгил бўлиб, уларга Мадина, Муслима, Юнус ва Юлдуз исмлари қўйилган. Чақалоқларнинг ота-онаси Шомурод Фармонов ва Раҳима Абдураҳмонова Кармана туманининг «Талқоқ» маҳалласида яшайди. Улар 2020 йилда турмуш қурган.
«Скрининг текширув пайтида чақалоқлар 4 нафар экани маълум бўлганди. Уларнинг 3 нафари қиз ва 1 нафари ўғил эканини ўшандаёқ аниқ айтишганди шифокорлар. Албатта, қувончимнинг чеки йўқ», — дейди Шомурод Фармонов.
Биринчи бола 1570 грамм, иккинчи бола 1460 грамм, учинчи бола 910 грамм, тўртинчи бола эса 1280 граммни ташкил этган. Чақалоқларнинг яқинларига туғруқхонанинг ўзида туғилганлик гувоҳномалари, банк ходимлари томонидан суюнчи пули топширилган.
Эслатиб ўтамиз, 7 декабрь куни Самарқанд вилоятининг Иштихон тумани Қулчора қишлоғида уч эгизак ўғил туғилганди. Уларга Шавкат, Мирзиё, Миромон исмлари қўйилган.
Шунингдек, апрель ойида Навоийда уч эгизак дунёга келган ва уларга Шукрона, Шодиёна, Имона исмлари қўйилганди.