Ўзбекистонда мис саноатидан олинадиган даромад қанчани ташкил этиши маълум қилинди

Ўзбекистоннинг мис саноатидан оладиган даромади айни пайтда 2,5 миллиард долларни ташкил этади. Бу ҳақда АОКАда бўлиб ўтган брифингда «Олмалиқ» КМК ахборот хизмати раҳбари Умида Қаршибоева маълум қилди.

Қайд этилишича, сўнгги 5 йилда ОКМК мис ишлаб чиқариш ҳажмини сезиларли даражада оширишга эришган. Хусусан, 2017 йилда 109 885 тонна мис ишлаб чиқарилган бўлса, ҳозирги кунда комбинат 148,5 минг тонна мис ишлаб чиқармоқда.

«Ёшлик 1 конини ўзлаштириш» инвестиция лойиҳаси тўлиқ ишга туширилгач, 2029 йилга келиб комбинат 400 минг тонна катодли мис, 50 тонна олтин, 270 тонна кумуш ишлаб чиқаришга эришади.

Маълум қилинишича, бугунги кунда ишлаб чиқарилаётган миснинг 60–70 фоизи хом ашё сифатида хориж давлатларига экспорт қилинади. Ўзбекистоннинг мис саноатидан оладиган даромади айни пайтда 2,5 миллиард долларни ташкил этади. Агар 2029 йилга келиб мис ишлаб чиқаришни 400 минг тоннагача оширишга эришилса, бу кўрсатгични 7-8 миллиард АҚШ долларига етказиш мумкинлиги таъкидланди.

Шунингдек, президентнинг топшириғига асосан мис саноати кластерини ташкил этиш ишлари бошлаб юборилган.