Ўзбекистон Халқ таълими вазирлигида 2021 йил бошидан ҳозирги кунга қадар жами 88 миллиард сўмлик молиявий хато-камчиликлар аниқланган, деб хабар беради ЎзА.
Фото: ЎзА
Халқ таълими вазири ўринбосари Темур Комиловнинг сўзларига кўра, вазирлик фаолиятида молиявий хато ва камчиликларни олдини олиш бўйича бир қанча лойиҳалар, платформалар амалга оширилмоқда. Хусусан, 2021 йилнинг 11 ойи давомида жами 368,6 миллиард сўмлик молиявий хато ва камчиликларнинг олди олинишига ва бартараф этилишига эришилган.
Шунга қарамасдан, йил бошидан ҳозирги кунга қадар вазирлик томонидан ўтказилган назорат тадбирлари натижасида жами 88 миллиард сўмлик молиявий хато-камчиликлар, шундан 27,5 миллиард сўмлик ўғирлик ва камомад аниқланган.
Шунингдек, тизимдаги энг кўп талон-торожлик, бюджет маблағларини ўзлаштириш ҳолатлари аниқланган ҳудудлар ҳақида маълумот берилган. Унга кўра, Андижон вилоятининг Андижон шаҳрида 11,5 миллиард сўм, Сирдарё вилоятининг Боёвут туманида 11 миллиард сўм ҳамда ушбу вилоятнинг Гулистон шаҳрида 4 миллиард сўм миқдорда бюджет маблағлари ўзлаштириб юборилган.
Таркибида жиноят аломатлари бўлган 159 та 72,9 миллиард сўмлик ўрганиш материаллари ҳуқуқий баҳо бериш ва қонуний чоралар кўриш мақсадида ҳуқуқ-тартибот органларига тақдим этилган.
Бундан ташқари, вазирликнинг Назорат-ҳуқуқий хизмати томонидан коррупцияга қарши курашиш борасида амалга оширилаётган ишлар бўйича ҳам батафсил маълумот берилган.
«Ҳозирга қадар соҳада йўл қўйилган хато ва камчиликлар юзасидан 243 нафар раҳбар ходимлар эгаллаб турган лавозимларидан озод этилган, 3 минг 415 нафарига нисбатан интизомий жазо чоралари кўрилган, 151 та ҳолат бўйича тўпланган материаллар ҳуқуқ-тартибот идораларига юборилган», – дейди Халқ таълими вазирлигининг Назорат-ҳуқуқий хизмати бошлиғи Искандар Тўраев.
Шунингдек, ўтган давр давомида вазирлик томонидан 264 минг 41 нафар ходим ҳуқуқлари ҳимоя қилиниб, 963 нафарининг ҳуқуқи тикланган бўлса, 188 та ҳолатда бошқа давлат органлари томонидан фаолиятга ноқонуний аралашув ва текширувларнинг олди олинган.
Аввалроқ Ўзбекистон мактабларига қабул қилишдаги коррупциявий хавфлар маълум қилинган эди. Улар асосан, микроҳудудларнинг квота тизими, мактаб биносининг етишмаслиги (синфларда ўқувчилари сони меъёридан ошиб кетиши), 1-синфга қабул қилишда таълим тили бўйича аниқ талаблар йўқлиги, таълим сифати пастлиги каби муаммолар билан боғлиқ.
