Ўзбекистон Республикаси Президентининг 2021 йил 15 июлдаги «Республикада ўсимликлар карантини ва ҳимояси тизимини тубдан такомиллаштириш чора-тадбирлари тўғрисида»ги 6262-сонли фармонига асосан, ўсимликларни ҳимоя қилиш соҳасини ривожлантириш ва қўллаб-қувватлаш мақсадида, соҳага оид мавжуд муаммоларнинг илмий ечимини таъминлаш ҳамда янги инновацион ишланмаларни амалиётга жорий қилиш бўйича 2021 йил 20 октябрь куни Ўзбекистон Республикаси Инновацион ривожланиш вазирлиги ва «Агробанк» акциядорлик тижорат банки ўртасида ҳамкорлик меморандуми имзоланди.
Мазкур тадбир муносабати билан оммавий ахборот воситалари вакиллари иштирокида матбуот анжумани ҳам ўтказилди. Анжуманда вазирлик ва банк масъул ходимлари, журналистлар, блогерлар ҳамда соҳа мутахассислари, олимлар иштирок этишди.
Меморандум доирасида «Агробанк» АТБ ҳамда Ўзбекистон Республикаси Инновацион ривожланиш вазирлиги Ўсимликларни ҳимоя қилиш илмий-тадқиқот институти ва соҳадаги илмий изланувчиларнинг илмий фаолиятини қўллаб-қувватлаш, янги инновацион ишланмаларни амалиётга жорий этиш, ўсимликларни ҳимоя қилиш йўналишида замонавий лабораторияларни ташкил этиш, жорий таъмирлаш ишларига қаратилган лойиҳаларга грант маблағини ажратишда ўзаро ҳамкорлик фаолиятини амалга оширади ва ҳамкорликда янги истиқболли илмий-инновацион лойиҳаларни ишлаб чиқиш мақсадида ўзаро ҳамкорлик қилади.
Илмий-тадқиқот ишларига оид лойиҳаларни шакллантиришда қуйидаги жиҳатлар инобатга олинади:
- ўсимликларни ҳимоя қилиш илмий-тадқиқот институти ва соҳадаги изланувчиларнинг илмий фаолиятини қўллаб-қувватлаш учун янги инновацион тадқиқотларни амалиётга жорий этишга қаратилган, илмий лойиҳаларни шакллантиришда зарур бўлган янги ишланмаларни яратиш, янги ғояларни рағбатлантириш;
- ўсимликларни ҳимоя қилиш ва қишлоқ хўжалигида янги конструкциялар, материаллар, усуллар, хизматларни яратишга ёки мавжудларини такомиллаштиришга хизмат қилиш;
- яратиладиган ишланманинг фан ва технологияларни ривожлантиришнинг устувор йўналишларига мос бўлиши;
- республика ҳудудларида соҳага оид аниқ муаммоларни илмий асосда ҳал этишга қаратилганлиги;
- лойиҳа натижасида якуний маҳсулотни (янги ишланмани) яратилиши асосланганлиги;
- ишланманинг рақобатбардошлилиги;
- лойиҳанинг натижадорлиги (маҳсулот ёки такомиллаштирилган технология);
- танловлар асосида молиялаштирилган лойиҳалар доирасида замонавий лаборатория ускуналари ҳамда тадқиқот жараёнлари учун бўлган замонавий техник воситалари билан таъминлашда ўзаро ҳамкорлик қилиш;
- ҳамкорликдаги илмий-тадқиқот ишлари йўналишлари бўйича янги илмий ишланмалар ва технологияларни республика иқтисодиёт тармоқларига жорий этиш бўйича таклифларни ишлаб чиқиш;
- Инновацион ривожланиш вазирлиги томонидан молиялаштиришга тавсия этилган илмий лойиҳалар (портфель)ни молиялаштириш ҳамда Ўзбекистон Республикаси Президентининг 2021 йил 15 июлдаги ПФ 6262-сон фармони талабларини бажариш;
- тадбирларни ОАВлар орқали ёритилишини таъминлаш вазифаларини амалга оширади.
Тадбир якунида Ўзбекистон Республикаси Инновацион ривожланиш вазирлиги ва «Агробанк» АТБ ўртасида ҳамкорлик меморандуми имзоланди. Оммавий ахборот воситалари вакиллари қизиқтирган саволларига батафсил жавоб олишди.
Реклама ҳуқуқи асосида.
