Олий Мажлис Қонунчилик палатаси мажлисида Ўзбекистон Президентининг фарқловчи белгилари, яъни ўз белгиси ва штандартини (байроғи) жорий этишга оид қонун муҳокама қилинди, деб хабар беради Адлия вазирлиги матбуот котиби.

Фото: Адлия вазирлиги матбуот котиби

Таъкидланишича, депутатларга қонун лойиҳасини адлия вазири Русланбек Давлетов тақдим қилган.

Қонун лойиҳаси билан Ўзбекистон Президентининг фарқловчи белгилари, яъни ўз белгиси ва штандарти (байроғи) юзасидан қоидалар киритилмоқда.

«Хорижий давлатларда давлат раҳбарининг ўз белгиси ва штандарти янги сайланган президентга қасамёд қабул қилгандан кейин топширилиши белгиланган. Ўзбекистон қонунчилигида ушбу масалалар тартибга солинмагани боис, қонунчиликни тегишли мазмундаги норма билан тўлдириш таклиф этилмоқда», — дейилади хабарда.

Ушбу тартиб лавозимга сайланган шахсни президентлик лавозимига юклатилган мураккаб вазифаларни самарали амалга оширишига халқ ва жамият томонидан билдирилган ишонч белгиси сифатида хизмат қилиши таъкидланган.

«Gazeta.uz»нинг ёзишича, ҳужжат Сенатга юборилган. Энди қонун юқори палата томонидан ҳам маъқулланиши лозим.