Ўзбекистонда 24 октябрь куни ўтказиладиган президентлик сайловларида ҳар бир туман ва шаҳардаги битта сайлов участкасига видеокамералар ўрнатилади. Бу ҳақда Марказий сайлов комиссияси раисининг ўринбосари Баҳром Қўчқоров маълум қилди.

Фото: «Дарё» / Мадина Нурман

«Бугунги кунда хорижий тажриба ва мавжуд имкониятлардан келиб чиқиб, жорий йилнинг 24 октябрь куни бўлиб ўтадиган президент сайловида ҳар бир туман ва шаҳардаги 1 тадан намунавий сайлов участкаларида 2 тадан камера ва зарурий қурилмаларни ўрнатиш бўйича тегишли чора тадбирлар амалга оширилмоқда. Рақамлар билан айтадиган бўлсак, 207 та туман ва шаҳарларда жами 414 та кузатув камералари ўрнатилиши белгиланган. 2019 йилга нисбатан бу 147 фоиз кўпроқ дегани», — дейди у.

Қўчқоровнинг сўзларига кўра, 414 та видеокузатув камералари ўрнатиладиган 207 та сайлов участкаларни маҳаллий ҳокимликлар Ахборот технологиялари ва коммуникацияларини ривожлантириш вазирлиги билан ҳамкорликда танлаб олган ва уларнинг рўйхатлари шакллантирган. Шунингдек, унинг қўшимча қилишича, Олий Мажлис Қонунчилик палатаси ва маҳаллий кенгашларга 2019 йили ўтган сайловларда синов тариқасида 60 та сайлов участкасида 120 та кузатув видеокамераси ўрнатилган эди.

«Таклиф этилаётган сайлов участкаларга видеокузатув камералари ўрнатилиб, овоз бериш жараёнлари Марказий сайлов комиссиясининг Saylov2021.uz сайлов портали, Матбуот марказидаги катта ҳажмдаги мониторда ва «Ўзбекистон24» телеканалида ҳамда Марказий сайлов комиссияси биносида онлайн трансляция қилиб борилади. Трансляция вақти 24 октябрь куни соат 08:00 дан 20:00 гача белгиланган», — дейди МСК раиси ўринбосари.

Бундан аввал чет элдаги Ўзбекистон фуқаролари учун 49 та давлатда стационар ва кўчма сайлов участкалари ташкил этилиши, Ўзбекистон Президенти сайловларини ўтказиш учун сайлов округлари ташкил этилгани тўғрисида хабар берилганди.