Сурхондарё вилоятидаги «Айритом» чегара божхона постида қўшни Афғонистондан жанговар ўқ-дори олиб ўтаётган ўзбекистонлик ҳайдовчи ушланди. Бу ҳақда «Дарё»га Божхона қўмитаси ахборот хизмати бош инспектори Ҳусан Тангриев хабар берди.

Фото: «Дарё» / Дилруҳ Исомиддинова

Таъкидланишича, «Айритом» чегара божхона постида божхона органлари томонидан контрабанда предметларининг ноқонуний айланмасига қарши тадбир ўтказилган.

Тадбир давомида қўшни Афғонистондан кириб келган ўзбекистонлик фуқаро Қ.Ҳ. бошқарувидаги Cobalt белгиланган тартибда божхона назоратидан ўтказилганда, унинг юкхонасидаги сумкада жанговар ўқ-дорилар туркумига кирувчи, отиш учун яроқли бўлган 1 дона 9 миллиметрли «Парабеллум» жанговар патрон борлиги аниқланган.

Фото: Божхона қўмитаси ахборот хизмати

Айни пайтда ҳолат юзасидан жиноят иши қўзғатилиб, терговга қадар текширув ҳаракатлари олиб борилмоқда.

Бундан аввал Сурхондарё вилоятидаги «Сариосиё» чегара постида Ўзбекистонга жанговар ўқ-дориларни олиб киришга уринган шахс ушланганди.