АҚШда Капитолийга ҳужум чоғида Proud Boys ўта ўнглар ҳаракати аъзолари орасида Федерал қидирув бюроси (ФҚБ) информатори бўлган. Бу ҳақда New York Times газетаси хабар берди.

Фото: Getty Images

Газета манбаси маълумотларига кўра, информатор ФҚБга конгресс биноси ёнида нималар бўлаётгани ҳақида хабар бериб турган. Информаторнинг версияси бўйича Proud Boys вакиллари асосан АҚШ собиқ президенти Дональд Трамп тарафдорларидан иборат оломонга эргашган, чунки улар штурм режасини олдиндан тузиб чиқмаган.

Информатор ФҚБдаги раҳбарига айтиб беришича, у Proud Boys вакиллари билан ҳужум куни Вашингтон ҳайкали ёнида учрашиб, Капитолийгача етиб борган ва оломон бинога бостириб кирганини кўрган. Сўнг у Капитолийга кирган, ҳеч кимга тегмаган ва ҳеч нарсани синдирмаган, кейинроқ дераза орқали конгресс биносини тарк этган.

Газета маълумотларига кўра, информатор ФҚБ билан 2020 йил июлида ҳамкорлик қилишни бошлаган ва Proud Boys’нинг бўлинмаларидан бирининг айрим аъзолари билан таниш бўлган, уларнинг баъзилари кейинроқ ҳужумда айбланган. Шунингдек, ФҚБнинг қўшимча информатори Proud Boys’нинг Капитолийни талон-торож қилишда қатнашган бошқа бир бўлинмасига алоқадор бўлган.

Эслатиб ўтамиз, 6 январь куни АҚШ Конгресси аъзолари Дональд Трампнинг президентлик сайловларида мағлуб бўлганини тасдиқлаш учун йиғилган вақтда Трампнинг тарафдорлари Конгрессга бостириб кирган. Полиция бир неча соат ўтибгина намойишчиларни Капитолийдан ҳайдаб чиқаришга муваффақ бўлган. Ҳуқуқ-тартибот органлари ходимлари ўқотар қурол, дубинка, кўздан ёш оқизувчи газдан фойдаланган. Капитолийнинг хавфсизлик ходими билан биргаликда, беш киши ҳалок бўлган.

Капитолийга ҳужум ҳақидаги иш бўйича 500 дан ортиқ америкаликка айблов эълон қилинган. Июль ойининг охирида ушбу иш бўйича биринчи марта қамоқ жазоси тайинланди — 38 ёшли Пол Хожкинс саккиз ойлик қамоққа ҳукм қилинди.

Аввалроқ Капитолийнинг етти нафар полиция ходими АҚШ собиқ президенти Дональд Трампни судга берганди. Даъво аризаси Трампнинг бир қатор ёрдамчилари ва радикал гуруҳлар етакчилари январь ойида Капитолийга бостириб киргани юзасидан берилган.