Қашқадарёнинг Нишон тумани «Каптарли» маҳалласида яшовчи 51 ёшли фуқаро 25 июль оқшомида уйидан ИИБ ходимлари томонидан соғлом ҳолда олиб кетилиб, 26 июль куни пешиндан сўнг шифохона орқали ўлик ҳолда қайтарилгани тўғрисида хабар берилганди. Бош прокуратура матбуот котиби Ҳаёт Шамсутдиновнинг маълум қилишича, ҳолат юзасидан Қарши туман прокуратураси томонидан терговга қадар текшириш ҳаракатлари олиб борилмоқда.

Аниқланишича, 25 июль куни Нишон тумани ИИБ ҲПБ профилактика инспекторлари томонидан чақирувга асосан яшаш уйидан маст ҳолда олиб кетилган ва вилоят наркология диспансерига ётқизилган Нурсоат Муҳаммадиев 26 июль куни вафот этган.

Мазкур ҳолат юзасидан Қарши туман прокуратураси томонидан терговга қадар текшириш ҳаракатлари олиб борилмоқда.

Марҳумнинг ўлим сабабларини аниқлаш мақсадида суд-тиббий экспертизаси тайинланган.

Бундан ташқари, Нурсоат Муҳаммадиевнинг вилоят диспансерида вафот этгани ҳодисаси бўйича вилоят Соғлиқни сақлаш ва Ички ишлар бошқармаларига хизмат текшируви тайинланган.

Аввалроқ 2021 йилнинг май ойида Қорақалпоғистоннинг Тахиатош туманида ИИБга олиб кетилган фуқаро вафот этгани, июль ойи бошида эса Сурхондарё вилоятининг Денов туманида ИИБга олиб кетилган фуқаронинг шифохонада жони узилгани ҳақида хабар берилган эди.