Ўзбекистонда 2021 йилнинг январь—май ойларида банклар томонидан аҳолига 2,67 триллион сўмлик автокредитлар берилди. Бу 2020 йилнинг шу даврига нисбатан 40,5 фоизга кўпдир, деб ёзмоқда Spot Иқтисодий тадқиқотлар ва ислоҳотлар маркази маълумотларига таяниб.
Турли вилоятларда ўсиш суръатлари турлича бўлди. Хусусан, Тошкентда бу кўрсаткич 104 фоизни ёки 1,1 триллион сўмни ташкил этди ва барча берилган автокредитларнинг қарийб ярмига тўғри келди.
2020 йилда Марказий банк автокредитлар бозорини барқарорлаштириш учун макропруденсиал назоратни кучайтирганди. Ўшанда Марказий банк раиси Мамаризо Нурмуродов автомобиллар хариди учун мунтазам кредит бераётган банклар келажакда уларни қандай хатарлар кутаётганини сезмаётганини айтганди.
«Автокредитлар бу жуда хавфли кредитлар бўлиб, бунда гаров таъминоти кредит билан сотиб олинган машинанинг ўзидир. Унинг қиймат баҳоси кундан кунга фойдаланиш меъёрида жуда камаймоқда. Макропруденсиал чора-тадбирларимиз ушбу бозорни маълум даражада барқарорлаштиришга имкон беради», — деб таъкидлаганди Марказий банк раиси.
У 2019 йилнинг февралида бўлиб ўтган Халқаро пресс клуб сессиясида ҳам автокредит хатарли кредит эканлигини айганди.
«Хатари кучли бўлган кредит турлари мавжуд. Масалан, автомобиль сотиб олишга бериладиган кредит. Худо кўрсатмасин, автомобиль авария бўлди, машина гаровга қўйилган, у энди йўқ. Шунинг учун, ўртадаги маржа деган нарса кредитни қайтариш хатари билан боғлиқ.
Банклар аҳолидан қабул қиладиган пул миқдори бевосита инфляция билан боғлиқ. Яъни кредит ставкаси инфляция билан ҳамоҳанг юради. Тадбиркор кредитга куйса, фақат ўзи куяди. Агар банк берган пулига куйса, ўзи билан кўпчиликни куйдиради. Чунки банк кредит сифатида ўз пулини эмас, балки халқ пулини беради», — деган эди Мамаризо Нурмуродов.
Изоҳ (0)