Тошкент шаҳар ҳокимлиги «Дўстлик» боғида кутилаётган ўзгаришлар тақдимотини намойиш этди. Таъкидланишича, боғ шовқинли аттракционларсиз ҳақиқий яшил дам олиш зонаси бўлади.
«Дўстлик» боғи бир неча йил давомида Миллатлараро муносабатлар ва хорижий мамлакатлар билан дўстона алоқалар қўмитасининг балансида бўлган ва ишламаган. Чиқиндиларни йиғиш ва дарахтларни суғориш Ободонлаштириш бошқармаси ходимлари ва кўнгиллилар томонидан амалга оширилган.
Боғ шаҳарга қайтарилади, уни Тошкент ҳокимлиги қайта тиклайди. Масъуллар боғни август ойининг охирида очишга ваъда берди.
Боғда қуйидагилар амалга оширилади:
- боғнинг барча дарахтлари сақланиб қолади. Шу жумладан, генерал-губернатор дала-ҳовлиси даврини кўрган учта қадимги чинор дарахтлари ҳам сақланади. Яна 700 тупга яқин дарахт ва бута экилади;
- барча сув ҳавзалари сақланиб қолади, уларнинг умумий майдони 10 000 квадрат метр, «юқори кўл»да фаввора ва лазерли томошалар ташкил этилади. «Капалак кўл»ларда фильтрлаш учун сув исроф қилинишининг олдини олиш мақсадида гидроизоляция ташкил этилмоқда. Кўл ва фаввораларга ҳамда суғоришга сувни етказиш учун бешта чуқур, насосли қудуқ қазилди;
- боғда шовқинли аттракционлар бўлмайди, велосипед йўлаги унинг марказий қисмидан ўтиб, сайрлар учун ташкил қилинган йўлаклар билан кесишмайди. Велосипедлар, самокатлар ва скейтлар ижараси ташкил қилинади;
- болалар учун майдончалар, мавзули, математик, географик, астрономик, лингвистик ва бошқа йўналишлардаги ҳудудлар ташкил қилиниб, улар фанларни ўйин шаклида ўрганиш учун формула ва алифболар билан таъминланади;
- концертлар ва бошқа тадбирлар учун амфитеатр, шахмат, воркаут, ёга ҳудудлари ҳамда спорт майдончалари қурилади;
- хоҳловчиларга майсали жойларда пикник қилиш учун ҳудудлар ажратилади. Шунингдек, автомобиль ва велосипедлар учун катта тураргоҳ қурилмоқда;
- 1976 йилда Тошкент ва Сиэтл шаҳарлари ўртасидаги қардошлик алоқаларининг рамзи сифатида бунёд этилган «Сиэтл боғи» ҳам реконструкция қилинади. Реконструкция муаллифлари боғнинг бирламчи кўринишини қайтариш мақсадида плиткалар ва болалар расмлари билан безатилган кўринишини иложи борича қайтаришга уринади. Шунингдек, глобусли чиройли фаввора қайта ишга туширилади;
- эскирган муҳандислик коммуникацияларининг ўрнига янгилари ўтказилмоқда. 120 та ёритгич ўрнатилади;
- боғга кириш бепуллигича қолади.
Эслатиб ўтамиз, Тошкентда боғлар, яшил ҳудудлар ва хиёбонлар сони кўпайтирилиши маълум қилинганди. Унга кўра, Тошкент шаҳрида умумий 140 гектар майдонга эга бўлган аттракционларсиз боғларни ва ҳар бир туманда кичик яшил боғларни ташкил қилиш режалаштирилган.
Изоҳ (0)