Бугун,

  • USD 11014.01
  • RUB 191.8
  • EUR 10674.78

«Маленькие свидетели войны» китоби ўзбек тилига таржима қилинди. «Уруш болалари» нашри республика бўйлаб мактаб кутубхоналарига тарқатилади.

28 июнь куни Халқ таълими вазирлигида «Капиталбанк» АТБ вакиллари «Podrobno.uz» ахборот агентлиги вакиллари билан биргаликда, вазир Шерзод Шерматовга «Уруш болалари» китобининг 3000 нусхасини бепул тақдим этиш тўғрисидаги сертификатни топширди.

«Тадбиркорларимиз томонидан мактабларга кўрсатилаётган бундай эътибор, албатта, бизни қувонтиради. Мактабларимизни сифатли китоблар билан тўлдириш масаласи бугунги кунда жуда ҳам долзарб масала саналади ва бугун тақдим этилган бу китоб нафақат болаларимизнинг тарихий билимини ривожлантиришга, балки кутубхоналарни ҳам мазмунли китоблар билан тўлдиришга ҳисса қўшади. Бу каби лойиҳалар келгусида ҳам давом этиб, болаларга ижтимоий китоблар билан бир қаторда, уларга келажакда молиявий саводхонликни ўргатадиган китоблар яратилса ҳам яхши бўлар эди», — деб таъкидлади тадбир давомида Халқ таълими вазири Шерзод Шерматов.

Китоб «Podrobno.uz» АА ва «Капиталбанк» АТБ қўшма лойиҳаси бўлиб, у ўзида болаликда урушдан омон қолган инсонларнинг хотираларини тўплаган. Уларнинг орасида уруш сабабли отасиз қолган ўзбек оилалари фарзандлари ва шиддатли жанглар зонасидан эвакуация қилинган, қамалда бўлган Ленинград ва фашистлар концлагерларида очликдан ўлаётган болалар ҳам бор.

«Бу биз учун ижтимоий лойиҳадир. Биз, ҳозирги авлод ота-боболарининг қилган ишларини ёдда тутишини, боши узра мусаффо осмон осойишталигини ва бугун мавжуд бўлган ҳамма нарсани қадрлашни истаймиз. 9 майга аталган китоб тақдимоти маросимида ушбу ўлмас ҳикоялар, албатта, давлат тилига таржима қилинишини эълон қилган эдик. Бугун биз ушбу китобларни кейинчалик мактаб кутубхоналарига топшириш учун Халқ таълими вазирлигига тақдим этганимиздан мамнунмиз», — деди «Капиталбанк» бошқаруви раиси Алишер Мирзаев.

Китоб ҳақиқатан ҳам мамлакатимиз учун ноёбдир. Ушбу даҳшатли урушни бола кўзи билан кўрган одамлар унинг саҳифалари орқали, қалбларни титратадиган ҳикояларини сўзлаб беришади. Уларнинг хотираларида — очлик, йўқотишлар, катталарнинг шафқатсизлиги, бошқа томондан эса қуёшли ўлка, номаълум тилда гапирадиган меҳрибон одамлар, иссиқ тандир нонлар, муҳаббат ва кўпчилик учун бир умрлик уйига айланган, янги уй мужассамлашган. Китоб қаҳрамонлари орасида таниқли инсонлар — Ўзбекистон ССР Коммунистик партияси Марказий Қўмитасининг собиқ биринчи котиби Рафиқ Нишонов, режиссёр Али Ҳамроев, темирчи оиласи томонидан асраб олинган, Молдовадан келган қиз Ольга Тимонина, Холида Шамаҳмудова, рассом Владимир Бурмакин ва бошқалар бор.

«Китобда сиз ўша даҳшатли урушнинг гувоҳи бўлган болаларнинг безаксиз хотираларини (уларнинг концлагерларда қандай қилиб жасад ташиганлиги, қариндошлари қандай куйдирилганини, очлик ва фашистларнинг ваҳшийликларидан минглаб одамлар қандай ўлганини кўргани ҳақидаги ҳикоялар) топасиз. Ҳамма нарсани йўқотган, аммо таслим бўлмаган, очликдан азият чеккан, аммо нонининг сўнгги урвоғини ҳам бошқаларга улашган болалар ҳақида ҳам ҳикоялар мавжуд. Бугун уларнинг авлодларидан сўрайдиган асосий нарса бу — ғалабанинг қанчалик қийинчилик ва машаққатлар билан қўлга киритганлигини ёдда тутиш ва бундан кейин ҳам бундай бўлишига йўл қўймасликдир», — деди ғоя муаллифи, «Podrobno.uz» АА бош муҳаррири Андрей Тешаев.

Эслатиб ўтамиз, рус тилидаги «Маленькие свидетели войны» китобининг тақдимоти 7 май куни Тошкентда бўлиб ўтган эди. Унинг чиқарилиши «Podrobno.uz» ААнинг ташаббуси билан амалга оширилди, «Капиталбанк» эса лойиҳанинг молиявий ҳамкори сифатида иштирок этди. Рус ва ўзбек тилларидаги китоб тижорат мақсадларида фойдаланиш учун мўлжалланмаган ҳолда, чекланган нусхада нашр этилган. Нашр мактаб, университет, кутубхона, музей ва маданият марказларига бепул шаклда тақдим этилади.

Кенг омма учун китоб электрон шаклда http://www.kapitalbank.uz ва http://www.podrobno.uz сайтларида мавжуд.

Реклама ҳуқуқи асосида.

Изоҳ
Асосий янгиликлар