“Malenkiye svideteli voyni” kitobi o‘zbek tiliga tarjima qilindi. “Urush bolalari” nashri respublika bo‘ylab maktab kutubxonalariga tarqatiladi.
28-iyun kuni Xalq ta’limi vazirligida “Kapitalbank” ATB vakillari “Podrobno.uz” axborot agentligi vakillari bilan birgalikda, vazir Sherzod Shermatovga “Urush bolalari” kitobining 3000 nusxasini bepul taqdim etish to‘g‘risidagi sertifikatni topshirdi.
“Tadbirkorlarimiz tomonidan maktablarga ko‘rsatilayotgan bunday e’tibor, albatta, bizni quvontiradi. Maktablarimizni sifatli kitoblar bilan to‘ldirish masalasi bugungi kunda juda ham dolzarb masala sanaladi va bugun taqdim etilgan bu kitob nafaqat bolalarimizning tarixiy bilimini rivojlantirishga, balki kutubxonalarni ham mazmunli kitoblar bilan to‘ldirishga hissa qo‘shadi. Bu kabi loyihalar kelgusida ham davom etib, bolalarga ijtimoiy kitoblar bilan bir qatorda, ularga kelajakda moliyaviy savodxonlikni o‘rgatadigan kitoblar yaratilsa ham yaxshi bo‘lar edi”, — deb ta’kidladi tadbir davomida Xalq ta’limi vaziri Sherzod Shermatov.
Kitob “Podrobno.uz” AA va “Kapitalbank” ATB qo‘shma loyihasi bo‘lib, u o‘zida bolalikda urushdan omon qolgan insonlarning xotiralarini to‘plagan. Ularning orasida urush sababli otasiz qolgan o‘zbek oilalari farzandlari va shiddatli janglar zonasidan evakuatsiya qilingan, qamalda bo‘lgan Leningrad va fashistlar konslagerlarida ochlikdan o‘layotgan bolalar ham bor.
“Bu biz uchun ijtimoiy loyihadir. Biz, hozirgi avlod ota-bobolarining qilgan ishlarini yodda tutishini, boshi uzra musaffo osmon osoyishtaligini va bugun mavjud bo‘lgan hamma narsani qadrlashni istaymiz. 9-mayga atalgan kitob taqdimoti marosimida ushbu o‘lmas hikoyalar, albatta, davlat tiliga tarjima qilinishini e’lon qilgan edik. Bugun biz ushbu kitoblarni keyinchalik maktab kutubxonalariga topshirish uchun Xalq ta’limi vazirligiga taqdim etganimizdan mamnunmiz”, — dedi “Kapitalbank” boshqaruvi raisi Alisher Mirzayev.
Kitob haqiqatan ham mamlakatimiz uchun noyobdir. Ushbu dahshatli urushni bola ko‘zi bilan ko‘rgan odamlar uning sahifalari orqali, qalblarni titratadigan hikoyalarini so‘zlab berishadi. Ularning xotiralarida — ochlik, yo‘qotishlar, kattalarning shafqatsizligi, boshqa tomondan esa quyoshli o‘lka, noma’lum tilda gapiradigan mehribon odamlar, issiq tandir nonlar, muhabbat va ko‘pchilik uchun bir umrlik uyiga aylangan, yangi uy mujassamlashgan. Kitob qahramonlari orasida taniqli insonlar — O‘zbekiston SSR Kommunistik partiyasi Markaziy Qo‘mitasining sobiq birinchi kotibi Rafiq Nishonov, rejissor Ali Hamroyev, temirchi oilasi tomonidan asrab olingan, Moldovadan kelgan qiz Olga Timonina, Xolida Shamahmudova, rassom Vladimir Burmakin va boshqalar bor.
“Kitobda siz o‘sha dahshatli urushning guvohi bo‘lgan bolalarning bezaksiz xotiralarini (ularning konslagerlarda qanday qilib jasad tashiganligi, qarindoshlari qanday kuydirilganini, ochlik va fashistlarning vahshiyliklaridan minglab odamlar qanday o‘lganini ko‘rgani haqidagi hikoyalar) topasiz. Hamma narsani yo‘qotgan, ammo taslim bo‘lmagan, ochlikdan aziyat chekkan, ammo nonining so‘nggi urvog‘ini ham boshqalarga ulashgan bolalar haqida ham hikoyalar mavjud. Bugun ularning avlodlaridan so‘raydigan asosiy narsa bu — g‘alabaning qanchalik qiyinchilik va mashaqqatlar bilan qo‘lga kiritganligini yodda tutish va bundan keyin ham bunday bo‘lishiga yo‘l qo‘ymaslikdir”, — dedi g‘oya muallifi, “Podrobno.uz” AA bosh muharriri Andrey Teshayev.
Eslatib o‘tamiz, rus tilidagi “Malenkiye svideteli voyni” kitobining taqdimoti 7-may kuni Toshkentda bo‘lib o‘tgan edi. Uning chiqarilishi “Podrobno.uz” AAning tashabbusi bilan amalga oshirildi, “Kapitalbank” esa loyihaning moliyaviy hamkori sifatida ishtirok etdi. Rus va o‘zbek tillaridagi kitob tijorat maqsadlarida foydalanish uchun mo‘ljallanmagan holda, cheklangan nusxada nashr etilgan. Nashr maktab, universitet, kutubxona, muzey va madaniyat markazlariga bepul shaklda taqdim etiladi.
Keng omma uchun kitob elektron shaklda http://www.kapitalbank.uz va http://www.podrobno.uz saytlarida mavjud.
Reklama huquqi asosida.
Izoh (0)