Forbes 2021 йил бўйича дунёнинг энг бой инсонлари рўйхатини эълон қилди. Биринчи ўрин 2020 йилдаги каби Amazon асосчиси Жефф Безосга насиб этди. Бир йил давомида унинг бойлиги 113 миллиард доллардан 177 миллиард долларга ўсган, деб ёзади Meduza.

Фото: iМаg.оne

Рейтингнинг иккинчи қаторида 151 миллиард долларлик бойлиги билан Tesla ва SpaceX асосчиси Илон Маск турибди. Бир йил олдин у энг бой ишбилармонлар рўйхатида атиги 31-ўринда турган ва рейтингни тузувчилар унинг бойлигини 24,6 миллиард долларга баҳолаган эди.

Учинчи ўринни 150 миллиард доллар билан Louis Vuitton Moet Hennessy раҳбари Бернард Арно эгаллади. Бир йил олдин Арно тўртинчи ўринда эди, ўшанда Forbes унинг бойлигини 76 миллиард долларга баҳолаган.

Таниқли инвестор Уоррен Баффет сўнгги 20 йил ичида биринчи марта «топ бешлик»дан тушиб кетди. Гарчи унинг бойлиги 67,5 миллиарддан 96 миллиард долларга ўсган бўлса-да, унга олтинчи ўрин насиб қилди.

Forbes қайд этганидек, рейтинг иштирокчиларининг умумий бойлиги, дунё бўйлаб пандемия ва иқтисодий муаммоларга қарамай, рекорд даражадаги 8 триллион долларга ўсиб, 13,1 триллион долларни ташкил этди. Рўйхатнинг юқори поғонасидан жой олганларнинг аксарияти технологик компания эгаларидир.

Сўнгги бир йилда бойлиги кескин ўсган ишбилармонлар орасида Telegram асосчиси Павел Дуров ҳам бор. У рейтингда 565-ўриндан 112-ўринга кўтарилди. Forbes маълумотларига кўра, Дуровнинг бойлиги 3,4 миллиарддан 17,2 миллиард долларга ўсган. Шу билан бирга, нашр Дуровни Бирлашган Араб Амирликлари вакили деб ҳисоблайди. Энг бой россиялик тадбиркор эса Алексей Мордашов бўлиб, у 29,1 миллиард доллар бойлиги билан рейтингда 51-ўринни эгаллади (бир йил олдин 54-ўринда эди).

Рейтинг иштирокчиларининг бойлигини баҳолаш учун уларга тегишли акцияларининг 5 март ҳолатига кўра қиймати асос қилиб олинди.

Forbes йиллик рейтингдан ташқари, дунёнинг энг бой ишбилармонлари бойлигидаги ўзгаришларни реал вақт режимида кузатиб боради. Ушбу рейтингда Маск анчадан бери етакчилар қаторида бўлиб келмоқда.