Тошкентда Халқаро хотин-қизлар куни муносабати билан «Аёллар етакчи лавозимларда: COVID-19 пандемияси шароитида тенг ҳуқуқли келажакка эришиш» мавзусида давра суҳбати бўлиб ўтди, деб хабар бермоқда «Gazeta.uz» БМТ Тараққиёт дастурига таяниб.
Хабарда айтилишича, унда Олий Мажлис Сенати раиси Танзила Норбоева нутқ сўзлаб, Ўзбекистонда хотин-қизларнинг ижтимоий ҳимояси ҳақида сўз юритди.
«‘Аёллар дафтари’ бўйича 6 миллион нафардан ортиқ аёл билан бевосита суҳбатлар ўтказилди ва оғир аҳволдагилари бу дафтарга киритилди. ‘Халқ банки’ ‘Аёллар банкиъга айланди, деб айтишимиз мумкин. Чунки аёлларни қўллаб-қувватлаш шу банк орқали амалга оширилмоқда ва бунинг учун қўшимча 1 триллион сўм маблағ ажратилди. Хорижий ҳамкорларимиз ҳам 2,7 миллион доллар миқдорида грант беряпти», — дея таъкидлаган у.
Танзила Норбоева олий таълимда қизлар сонини ошириш масаласига ҳам тўхталган.
«Бу йил эҳтиёжманд оилаларнинг 2 минг нафар қизи олий таълим муассасаларида бепул ўқитилади, ўтган йили уларнинг сони 950 нафар эди. Бу сонни ошириб бориш масаласи шахсан давлат раҳбари назоратида турибди. Биз олий таълим олувчилар орасида қизларни 50 фоизга етказишга ҳаракат қилишимиз керак», — деб таъкидлаган Сенат раиси.
Эслатиб ўтамиз, Шавкат Мирзиёев 29 декабрь куни Олий Мажлисга йўллаган Мурожаатномасида ислоҳотларнинг устувор йўналишларидан бири аёлларнинг давлат ва жамоат бошқарувидаги ролини янада ошириш эканини айтиб ўтганди. «Мамлакатда яшовчи 17 миллиондан зиёд аёл — қизларимиз, оналаримиз ва бувиларимиз учун муносиб турмуш шароитларини яратиш учун қўлимиздан келган барча ишни амалга оширишимиз лозим», — деган эди Президент.
Давлат раҳбари «ҳаётни ва аёллар муаммоларини яхши биладиган, фаол ва ташаббускор аёллардан иборат» Республика хотин-қизлар жамоатчилик кенгашини ташкил этишни ва унга Сенат раиси Танзила Норбоевага раҳбарлик қилишни таклиф қилганди.
Мурожаатномада, шунингдек, аёлларнинг бизнес лойиҳаларини қўллаб-қувватлаш ҳамда жойларда аниқланган хотин-қизлар муаммоларини ҳал қилиш учун бюджетдан қўшимча равишда 1 триллион сўмдан ортиқ маблағ ажратилиши айтилган.
Президентининг «2020/2021-ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида»ги қарорига кўра, хотин-қизларнинг ОТМга киришида қўшимча тўрт фоизли давлат гранти асосида квота ажратилганди.
Изоҳ (0)