Сурхондарёда ўз жияни номига аукционсиз ер майдони ажратиб, уни катта пулга сотмоқчи бўлган туман қурилиш бўлими бошлиғи ДХХ томонидан қўлга олинди. Бу ҳақда «Ўзбекистон 24» телеканалида эфирга узатилган лавҳада сўз боради.

Маълум қилинишича, Сурхондарё вилояти Жарқўрғон тумани қурилиш бўлими бошлиғи «Ёшлар — келажагимиз» давлат дастури доирасида «Қораёнтоқ» маҳалласи ҳудудидан 4,5 сотих ер майдонини ўз жияни номига «Ёшлар меҳнат гузари» қурилиши учун аукцион савдолари ўтказмасдан ажратиб берган.

У мазкур ер майдонига «Ёшлар меҳнат гузари» қурмасдан, уни бошқа бир фуқарога 180 миллион сўмга сотишга келишиб, ушбу пулларни қариндошлари орқали олаётган вақтида ашёвий далиллар билан ушланган.

Ҳозирда мазкур шахсга нисбатан Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилиб, тергов ҳаракатлари олиб борилмоқда.

Аввалроқ Фарғонада 8 гектар ер олишда ёрдам бериш эвазига 8 минг доллар олган собиқ кадастр ходими ушлангани, Сирдарёда 12 сотих ерни расмийлаштириб бериш учун 1200 доллар талаб қилган қурилиш бўлими бошлиғи ва унинг ўртада воситачилик қилган шериги қўлга олингани тўғрисида хабар берилганди.