Англия Премьер Лигасининг 22-туридан ўрин олган учрашувда «Манчестер Юнайтед» ўз майдонида «Саутҳэмптон»ни қабул қилди ва йирик 9:0 ҳисобида ғалаба қозонди.
Футбол ўйинларидаги статистикаларга оид маълумотларни бериб борадиган MisterChip’нинг ёзишича, «Саутҳэмптон» АПЛнинг 2019/20 йилги мавсумида «Лестер»га 0:9 ҳисобида мағлуб бўлганидан роппа-роса 1 йил-у 3 ой ўтгач «Манчестер Юнайтед»га ҳам худди шу ҳисобда (0:9) имкониятни бой берди. Шу тариқа «авлиёлар» 128 йил ичида кетма-кет икки йилда Англия Премьер Лигасининг 2 та ўйинида 9 ва ундан кўпроқ гол фарқи билан мағлуб бўлган илк клубга айланди.
Икки йилдан кам вақт ичида, аниқроғи 1 йил-у 8 ой ичида бундай голлар фарқи билан ютқазган сўнгги клуб «Дарвен» бўлганди. Клуб 1892 йилнинг апрелида «Вест Бромвич»га 0:12, 1893 йилнинг декабрида эса «Астон Вилла»га 0:9 ҳисобида ютқазган.
Оле-Гуннар Сульшер шогирдлари 22 учрашувдан сўнг 44 очко билан мусобақа жадвалида 2-ўринда бормоқда. «Саутҳэмптон» эса (29) 12-поғонадан жой олган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)