Ўзбекистонга қор бўрони ёпирилди. Электр таъминотида узилишлар бошланган, ЙПХ ҳайдовчилардан заруратсиз машина ҳайдамасликни сўрамоқда
Ўзбекистоннинг барча вилоятларида қор бўрони кузатилмоқда. ИИВ ЙҲХББ ахборот хизматининг маълум қилишича, ҳозирда ҳудудий ЙҲХБ ва йўлга масъул ходимлар томонидан йўлни қордан тозалаш ишларига махсус техникалар жалб этилган.
Фавқулодда вазиятлар вазирлиги Ўзбекистоннинг шимолий вилоятларида, хусусан, Хоразмда об-ҳаво кескин совуб кетганини маълум қилиб, кучли қор ёғаётгани тасвирланган суратлар билан бўлишди. Вилоятнинг кўплаб туманлари электр таъминотисиз қолган. Йўлларда музламаларнинг олдини олиш мақсадида туз-қум аралашмаси сепилмоқда. Шунингдек, Қарши шаҳар ҳокимлиги ахборот хизматининг ёзишича, шаҳардаги йўлларнинг қатнов қисмига ҳам музламага қарши қум ва туз аралашмаси сепиб чиқилмоқда.
ФВВ Қамчиқ довонида кучли қор ёғиши кузатилаётгани сабаб йўллар махсус техникалар ёрдами тозаланаётгани тасвирланган видео билан бўлишди. Шунингдек, ижтимоий тармоқларда довон йўлида тирбандликлар юзага келгани тўғрисида хабарлар тарқалган.
Telegram’даги «Андижон бугун» каналида эса вилоятда қор бўрони сабаб юзага келган кўнгилсиз ҳодисалар тўғрисида маълумот берилмоқда. Хусусан, Андижон шаҳридаги «Рубоий» кафеси олдидаги реклама баннери устуни шамолда эгилиб кетган.
Бундан ташқари, Боғишамолдаги эски машина бозоридаги дўконнинг томи учиб кетиб, Damas устига қулаган, Шаҳрихонда «Ватанпарвар» ташкилотининг томи шамолда учиб кетиб, Эсперо ва Damas’ни босиб қолган, Асакада бодринг экилган иссиқхоналарнинг плёнкаси учиб кетган.
Аввалроқ Ўзбекистонда ҳафта охирларига бориб ҳаво кескин совиб, қор ёғиши ҳақида маълум қилинганди. Шу билан бирга, Тошкент ИИББ пойтахтда кучли шамол бўлиши кутилаётгани сабабли аҳолини огоҳлантирди.
