Икки йил давомида фарзанд кўришни режалаштирган оилада ҳеч қандай натижа юз бермаган эди. Барча уринишлар ва тиббий аралашув ҳам муваффақиятсиз якунланган. Ниҳоят муолажаларнинг якунидан сўнг Бриана Дрискелл тестда ижобий натижага эришган.
Фото: «Домашний очаг»
Бундан аввалроқ шифокорлар Бриана ва унинг турмуш ўртоғи Жорданга сунъий уруғлантиришдан сўнг уч эгизак туғилиш эҳтимоли 4-8 фоизни ташкил этишини маълум қилган. Аммо айнан бундай бўлиши ҳеч кимнинг хаёлига келмаган. Ҳомиладорликнинг саккизинчи ҳафтасида ультратовуш текшируви Бриананинг ичида 5 та боланинг юраги ураётганини кўрсатди…
«Мен деярли ҳушсиз эдим, нима дейишни ҳам билмай қолдим ва фақатгина монитордаги тасвирни томоша қилардим», − дейди 29 ёшли Бриана. Бу ҳақиқий мўъжизага ўхшарди, лекин Бриананинг ҳомиладорлик даври осон кечмади.
Сунъий уруғлантиришдан сўнг Брианада кучли токсикоз – кўнгил айниши ва қайт қилиш кузатилди. У бир муддат шифокорлар кўригида бўлди. 22-ҳафтада эрта туғилиш хавфи юз берганида Бриана яна касалхонага ётқизилди – бу сафар у ерда кўпроқ қолишга мажбур бўлди.
Фото: «Домашний очаг»
«Квинтет» Америкада май ойида нишонланадиган «Оналар куни»да туғилди. Улар уч қиз ва икки ўғил: Зои Харт, Дакота Фейт, Холин Грэйс, Ашер Блейз ва Гевин Лейн. Уларнинг вазни 800 граммдан бошлаб килограммгача бўлиб, шунинг учун ҳам чақалоқлар зудлик билан жонлантириш бўлимига ўтказилган.
Бриана узоқ кутган фарзандларини улар туғилганидан бир кун ўтиб кўришга муваффақ бўлди. «Ниҳоят уларни кўриб, жуда қаттиқ йиғлаганимдан нафас олишим қийинлашиб қолди. Она бўлганимга ҳали ҳам ишонгим келмайди. Бу худди тушга ўхшайди», − дейди у.
Ёлғиз жуфтликнинг 5 та фарзандли катта оилага айланиши бу чинакамига ўзгаришдир. Бриана ва Жорданни қўллаб қувватлаш мақсадида аллақачон Интернетда касалхона тўлови ва бир вақтнинг ўзида бешта чақалоқ ўриндиғи сиғадиган янги машина сотиб олиш учун маблағ йиғиш эълон қилинган.
