«Дарё» ўқувчиларидан бири чилим чекаётган боғча опалар видеосини юбориб, Қашқадарёдаги боғчаларда чилим чекаётган аёллар фаолият юритаётганини маълум қилди.
Фото: «Дарё»
Видео муаллифининг маълумот беришича, чилим чекаётган боғча опалар Қашқадарёнинг Миришкор туманидаги 8-сонли мактабгача таълим ташкилотида фаолият юритади.
Таъкидланишича, Дурдона Тоирова раҳбарлигидаги мазкур таълим даргоҳида таълим-тарбия қониқарсиз аҳволда.
Мурожаатчи тақдим қилган суратларда тарбияланувчиларнинг пала-партиш овқатланаётгани акс этган.
«Бу боғчада ҳар доим шу аҳвол. Сабаби назорат йўқ. Таълим-тарбияни сўрайдиган одам йўқ», — дейди «Дарё» мухбири билан мулоқот қилган мурожаатчи.
Фото: «Дарё»
«Дарё» мухбири билан суҳбатлашган 8-мактабгача таълим ташкилоти раҳбари Дурдона Тоирова эса видеодаги ҳолат раҳбарлигидаги боғчада содир бўлганини тасдиқлаб, воқеага ойдинлик киритилаётганини билдирди.
«Ҳозир беш нафар ходимимизни бўлимга чақиришган. Шу воқеага ойдинлик киритилмоқда», — дейди боғча мудираси.
Дурдона Тоированинг маълумот беришича, туманнинг Чандир қишлоғидаги мазкур боғча 200 ўринли бўлиб, ҳозирда 120 нафар бола тарбияланмоқда. Таълим даргоҳида 29 нафар ходим фаолият юритади.
Миришкор туман мактабгача таълим бўлими бошлиғи Мавжуда Жумаеванинг «Дарё»га маълум қилишича, мазкур воқеа бўйича боғчанинг 5 нафар ходими — ҳамшира, ошпаз ва уч нафар ёрдамчи тарбиячи ҳамда раҳбари ишдан олинган.
