Ҳафтанинг энг муҳим ва муҳокамабоп мавзулари «Daryo.uz» дайжестида.
«Davletov.uz» Telegram-каналида Сирдарё вилояти Оқолтин тумани ҳокимининг қорин айланаси, бўйи ва вазнини ўлчанаётганлиги фотосурати қўйилди. Бу бежиз эмас, чунки келаси йилдан бошлаб вазир ва ҳокимларнинг семизлик даражаси мониторинг қилиб борилади. Бақалоқларни онлайн кузатиб бориш тизими йўлга қўйилади.
Давлат органлари ва ташкилотларининг иш куни давомида ишлаб чиқариш гимнастикаси машқлари бажариши учун иш вақтига киритиладиган махсус танаффуслар белгиланади. Ҳар чоракда ҳар бир туман (шаҳар)да «Соғлом турмуш тарзи ривожланган маҳалла» танлови ташкил этилади. 2021 йилда 50 та спорт зали, 48 та спорт иншооти қурилиб, фойдаланишга топширилади.
* * *
Бу ҳафтада Ўзбекистон делегацияси Сурияга бориб, у ерда қийин аҳволга тушиб қолган аёллар ва болаларни Ўзбекистонга қайтариш бўйича навбатдаги тадбирнинг ташкилий масалаларини ўрганди. Шундай қилиб, Ўзбекистон учинчи марта ўз фуқароларини жанггоҳдан қайтаришга тайёргарлик кўрмоқда. Ўтган йили май ойида «Меҳр» операцияси мобайнида Дамашқдан 156 нафар ўзбекистонлик, асосан аёллар ва болалар қайтариб келинган эди. Ўша йили октябрда эса иккинчи марта фуқароларимиз мамлакатга қайтарилган.
Суриядаги ўзбекистонликларнинг аксарияти Туркия орқали кетган бўлиб, улар ҳозир адашганини тушуниб етгандир. Ўтган йили чоп этган хабарда мамлакатга қайтарилганларнинг бири буни тасдиқлаган эди.
* * *
Коронавирус қўрқуви аста-секин чекинмоқда. Дунёнинг етакчи давлатлари эса вакцина синовларининг муваффақияти билан тез-тез бўлишиб турибди. Шу аснода мамлакатимизда ҳам пандемия туфайли киритилган баъзи чекловлар юмшаяпти. Хусусан, Учтепа туманидаги «Атлас» савдо мажмуаси биносида COVID-19 ва атипик пневмонияга чалинган беморлар учун ташкил этилган тақсимот маркази ёпилди. Тез орада Тошкент шаҳридаги «Ёшлик» спорт мажмуасида ташкил этилган марказ фаолияти ҳам тўхтатилади. «Ёшлик» июлнинг, «Атлас» эса сентябрнинг охирида беморлар учун ташкил қилинган эди.
2020 йилнинг 1 декабридан Ўзбекистонда компьютер ўйинлари марказлари фаолиятига рухсат берилади. Бунда компьютер ўйинлари марказлари ижтимоий масофа сақлаш, ниқоб ва қўлқоп тақиш, ҳарорат ўлчаш ва бошқа санитария-эпидемиологик қоидаларга қатъий риоя қилиниши белгилаб қўйилади.
Мамлакатимизда коронавирус бўйича саволларга жавоб берадиган Call-марказ фаолияти вақтинчалик тўхтатилиб, унинг вазифалари 1003 Call-марказига юклатилади. Коронавирус билан боғлиқ вазият мураккаблашган пайтда аҳолининг касаллик билан боғлиқ саволларига ўз вақтида жавоб бериш, тиббий йўл-йўриқ кўрсатиш тизими йўлга қўйилган эди. Аммо охирги вақтда 1105 қисқа рақамли Call-марказга мурожаатлар кескин камайиб кетган.
* * *
Яна бир агентлик ташкил қилинадиган бўлди. Президентнинг «Ўсимликларни ҳимоя қилиш ва агрокимёвий таҳлил тизимларида давлат бошқарувини ислоҳ қилиш чора-тадбирлари тўғрисида»ги қарори лойиҳасида Ўсимликларни ҳимоя қилиш агентлиги ташкил этиш ҳақида гап боради.
Ўсимликларни ҳимоя қилиш соҳасида ягона давлат сиёсати ва назоратини юритиш, органик маҳсулотлар етиштириш билан боғлиқ тадбирларни қўллаб-қувватлаш, қишлоқ хўжалиги экин майдонларида зараркунанда, касалликлар ва бегона ўтларнинг ривожланиши ва тарқалишини башорат қилиш, ўсимликларни ҳимоя қилиш воситаларига бўлган илмий талабни шакллантириш, чигиртка ва тут парвонасига қарши кураш, агрокимёвий таҳлил хизматлари фаолиятини мувофиқлаштириш, халқаро ҳамкорликни кенгайтириш ҳамда илғор технологиялар ва иш услубларини ўсимликларни ҳимоя қилиш хизмати фаолиятига татбиқ этиш ва бошқа ишлар агентликнинг вазифасига киради. Агентлик ва марказ ўз фаолияти бўйича Ўзбекистон Қишлоқ хўжалиги вазирлигига ҳисобот беради
* * *
Ҳафтанинг яна бир воқеаси кўплаб ахборот сайтларига алоқадордир. Аввалроқ электр энергияси ва табиий газ билан боғлиқ муаммолар ҳақида ижтимоий тармоқларда тарқалган қизиқарли ва танқидий постлар жамланиб, «Kun.uz» сайтида эълон қилиниши ортидан Ахборот ва оммавий коммуникациялар агентлиги бош директори Асаджон Ходжаев таҳририятни нохолисликда айблади ва «жиддий ҳуқуқий оқибатлар»дан огоҳлантирди. Таҳририят буни босим деб ҳисоблади.
Шундан сўнг АОКА янада фаоллашиб коронавирус статистикасига шубҳа билдирган нашрлар «Gazeta.uz», «Podrobno.uz» ҳамда «Дарё»га огоҳлантириш берди. «Дарё»га берилган «огоҳлантириш» ҳам бу икки сайтники билан мазмунан бир, фақат «қонунбузилиш ҳолатларига йўл қўйган» сайт номи ва тегишли ҳаволалар ўзгарган, холос. Огоҳлантириш «Ўзбекистонда COVID-19 билан касалланганлар учун ажратилган койкаларда 6 570 бемор ётибди. Бу ССВ статистикасидаги рақамдан уч баробар кўп» хабарига қаратилган. АОКА буни тўла текширилмаган деб ёзган, бироқ «Дарё» ССВга юборган кўплаб сўровлари жавобсиз қолавергани боис хабарни тўла текшириш имкони йўқ. «Дарё» бош муҳаррири «огоҳлантириш хати» тўғрисида «Биз АОКАнинг бу хатини босим деб ҳисобламаймиз, чунки шу кеча-кундузда ОАВга бундан баттар, ростмана жиддий (ва баъзан тутуриқсиз) босимлар етарлича, йўқ жойдан яна бир босим ўйлаб топиш маъқул эмас. Бу — бор-йўғи олдига қўйилган кўплаб вазифалардан бирини (масалан, матбуот хизматлари фаолиятини лозим даражада мувофиқлаштиришни) эплай олмаётган давлат ташкилотининг ёқимсиз бир огоҳлантириш хати. Фақат ҳаддан ортиқ ўринсиз ва мантиқсиз», деб ёзди.
28 ноябрь куни АОКА маҳаллий ОАВга юборилаётган огоҳлантириш хатлари бўйича расмий баёнот берди. Бугун Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ушбу расмий баёнотга муносабат билдирди. Алламжонов бу вазиятда ОАВни қўллади, улар тўғри йўлда эканлигини билдирди. «Энг асосийси, билингки, ушбу жараёнга тўсиқ ёки қаршиликлар бўлиши мумкин, лекин бу фойдасиз. Катта ғилдирак жойидан қўзғалиб, юриб бўлди. Энди у тўхтамайди. Чунки ушбу ислоҳотнинг концепцияси жуда пухта яратилган!», — деб ёзди у.
Энг муҳим ва мунозарали янгиликларни «Daryo.uz»да кузатиб боринг. Биз билан қолинг.
Изоҳ (0)