Haftalik dayjest: Qorinni onlayn kuzatish, Suriyaga uchinchi reys, A, OKA, bu qanday gap?
Haftaning eng muhim va muhokamabop mavzulari “Daryo.uz” dayjestida.
“Davletov.uz” Telegram-kanalida Sirdaryo viloyati Oqoltin tumani hokimining qorin aylanasi, bo‘yi va vaznini o‘lchanayotganligi fotosurati qo‘yildi. Bu bejiz emas, chunki kelasi yildan boshlab vazir va hokimlarning semizlik darajasi monitoring qilib boriladi. Baqaloqlarni onlayn kuzatib borish tizimi yo‘lga qo‘yiladi.
Davlat organlari va tashkilotlarining ish kuni davomida ishlab chiqarish gimnastikasi mashqlari bajarishi uchun ish vaqtiga kiritiladigan maxsus tanaffuslar belgilanadi. Har chorakda har bir tuman (shahar)da “Sog‘lom turmush tarzi rivojlangan mahalla” tanlovi tashkil etiladi. 2021-yilda 50 ta sport zali, 48 ta sport inshooti qurilib, foydalanishga topshiriladi.
* * *
Bu haftada O‘zbekiston delegatsiyasi Suriyaga borib, u yerda qiyin ahvolga tushib qolgan ayollar va bolalarni O‘zbekistonga qaytarish bo‘yicha navbatdagi tadbirning tashkiliy masalalarini o‘rgandi. Shunday qilib, O‘zbekiston uchinchi marta o‘z fuqarolarini janggohdan qaytarishga tayyorgarlik ko‘rmoqda. O‘tgan yili may oyida “Mehr” operatsiyasi mobaynida Damashqdan 156 nafar o‘zbekistonlik, asosan ayollar va bolalar qaytarib kelingan edi. O‘sha yili oktabrda esa ikkinchi marta fuqarolarimiz mamlakatga qaytarilgan.
Suriyadagi o‘zbekistonliklarning aksariyati Turkiya orqali ketgan bo‘lib, ular hozir adashganini tushunib yetgandir. O‘tgan yili chop etgan xabarda mamlakatga qaytarilganlarning biri buni tasdiqlagan edi.
* * *
Koronavirus qo‘rquvi asta-sekin chekinmoqda. Dunyoning yetakchi davlatlari esa vaksina sinovlarining muvaffaqiyati bilan tez-tez bo‘lishib turibdi. Shu asnoda mamlakatimizda ham pandemiya tufayli kiritilgan ba’zi cheklovlar yumshayapti. Xususan, Uchtepa tumanidagi “Atlas” savdo majmuasi binosida COVID-19 va atipik pnevmoniyaga chalingan bemorlar uchun tashkil etilgan taqsimot markazi yopildi. Tez orada Toshkent shahridagi “Yoshlik” sport majmuasida tashkil etilgan markaz faoliyati ham to‘xtatiladi. “Yoshlik” iyulning, “Atlas” esa sentabrning oxirida bemorlar uchun tashkil qilingan edi.
2020-yilning 1-dekabridan O‘zbekistonda kompyuter o‘yinlari markazlari faoliyatiga ruxsat beriladi. Bunda kompyuter o‘yinlari markazlari ijtimoiy masofa saqlash, niqob va qo‘lqop taqish, harorat o‘lchash va boshqa sanitariya-epidemiologik qoidalarga qat’iy rioya qilinishi belgilab qo‘yiladi.
Mamlakatimizda koronavirus bo‘yicha savollarga javob beradigan Call-markaz faoliyati vaqtinchalik to‘xtatilib, uning vazifalari 1003 Call-markaziga yuklatiladi. Koronavirus bilan bog‘liq vaziyat murakkablashgan paytda aholining kasallik bilan bog‘liq savollariga o‘z vaqtida javob berish, tibbiy yo‘l-yo‘riq ko‘rsatish tizimi yo‘lga qo‘yilgan edi. Ammo oxirgi vaqtda 1105 qisqa raqamli Call-markazga murojaatlar keskin kamayib ketgan.
* * *
Yana bir agentlik tashkil qilinadigan bo‘ldi. Prezidentning “O‘simliklarni himoya qilish va agrokimyoviy tahlil tizimlarida davlat boshqaruvini isloh qilish chora-tadbirlari to‘g‘risida”gi qarori loyihasida O‘simliklarni himoya qilish agentligi tashkil etish haqida gap boradi.
O‘simliklarni himoya qilish sohasida yagona davlat siyosati va nazoratini yuritish, organik mahsulotlar yetishtirish bilan bog‘liq tadbirlarni qo‘llab-quvvatlash, qishloq xo‘jaligi ekin maydonlarida zararkunanda, kasalliklar va begona o‘tlarning rivojlanishi va tarqalishini bashorat qilish, o‘simliklarni himoya qilish vositalariga bo‘lgan ilmiy talabni shakllantirish, chigirtka va tut parvonasiga qarshi kurash, agrokimyoviy tahlil xizmatlari faoliyatini muvofiqlashtirish, xalqaro hamkorlikni kengaytirish hamda ilg‘or texnologiyalar va ish uslublarini o‘simliklarni himoya qilish xizmati faoliyatiga tatbiq etish va boshqa ishlar agentlikning vazifasiga kiradi. Agentlik va markaz o‘z faoliyati bo‘yicha O‘zbekiston Qishloq xo‘jaligi vazirligiga hisobot beradi
* * *
Haftaning yana bir voqeasi ko‘plab axborot saytlariga aloqadordir. Avvalroq elektr energiyasi va tabiiy gaz bilan bog‘liq muammolar haqida ijtimoiy tarmoqlarda tarqalgan qiziqarli va tanqidiy postlar jamlanib, “Kun.uz” saytida e’lon qilinishi ortidan Axborot va ommaviy kommunikatsiyalar agentligi bosh direktori Asadjon Xodjayev tahririyatni noxolislikda aybladi va “jiddiy huquqiy oqibatlar”dan ogohlantirdi. Tahririyat buni bosim deb hisobladi.
Shundan so‘ng AOKA yanada faollashib koronavirus statistikasiga shubha bildirgan nashrlar “Gazeta.uz”, “Podrobno.uz” hamda “Daryo”ga ogohlantirish berdi. “Daryo”ga berilgan “ogohlantirish” ham bu ikki saytniki bilan mazmunan bir, faqat “qonunbuzilish holatlariga yo‘l qo‘ygan” sayt nomi va tegishli havolalar o‘zgargan, xolos. Ogohlantirish “O‘zbekistonda COVID-19 bilan kasallanganlar uchun ajratilgan koykalarda 6 570 bemor yotibdi. Bu SSV statistikasidagi raqamdan uch barobar ko‘p” xabariga qaratilgan. AOKA buni to‘la tekshirilmagan deb yozgan, biroq “Daryo” SSVga yuborgan ko‘plab so‘rovlari javobsiz qolavergani bois xabarni to‘la tekshirish imkoni yo‘q. “Daryo” bosh muharriri “ogohlantirish xati” to‘g‘risida “Biz AOKAning bu xatini bosim deb hisoblamaymiz, chunki shu kecha-kunduzda OAVga bundan battar, rostmana jiddiy (va ba’zan tuturiqsiz) bosimlar yetarlicha, yo‘q joydan yana bir bosim o‘ylab topish ma’qul emas. Bu — bor-yo‘g‘i oldiga qo‘yilgan ko‘plab vazifalardan birini (masalan, matbuot xizmatlari faoliyatini lozim darajada muvofiqlashtirishni) eplay olmayotgan davlat tashkilotining yoqimsiz bir ogohlantirish xati. Faqat haddan ortiq o‘rinsiz va mantiqsiz”, deb yozdi.
28-noyabr kuni AOKA mahalliy OAVga yuborilayotgan ogohlantirish xatlari bo‘yicha rasmiy bayonot berdi. Bugun Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov ushbu rasmiy bayonotga munosabat bildirdi. Allamjonov bu vaziyatda OAVni qo‘lladi, ular to‘g‘ri yo‘lda ekanligini bildirdi. “Eng asosiysi, bilingki, ushbu jarayonga to‘siq yoki qarshiliklar bo‘lishi mumkin, lekin bu foydasiz. Katta g‘ildirak joyidan qo‘zg‘alib, yurib bo‘ldi. Endi u to‘xtamaydi. Chunki ushbu islohotning konsepsiyasi juda puxta yaratilgan!”, — deb yozdi u.
Eng muhim va munozarali yangiliklarni “Daryo.uz”da kuzatib boring. Biz bilan qoling.
