Тошкент вилоятида беш нафар номаълум шахс юриб кетаётган тепловоздан кўмир ўғирламоқчи бўлди. Бу ҳақда «Ўзбекистон темир йўллари» матбуот хизмати хабар берди.

Фото: «Ўзбекистон темир йўллари»  матбуот хизмати

Қайд этилишича, 17 ноябрь куни Олмалиқ кон металлургия комбинатининг Ангрен шаҳридаги филиалига тегишли кўмир ортилган 50 вагонли юк поезди тўрттасини узиб қолдириш учун «Облиқ» темир йўл бекатида тўхтаган. Узиб қолинган вагонлар белгиланган манзилга олиб бориш учун тепловозга уланган. Юк поезди ҳаракатланган вақтда 5 нафар номаълум шахс вагонга осилиб, кўмир маҳсулотини талон-торож қилишга уринган.

Ушбу юк поэздига ҳамроҳлик қилган «Ўзбекистон темир йўллари» ҳарбийлаштирилган қўриқлаш отряди ходими зудлик билан тепловозни тўхтатиб, талончиларни ушлашга ҳаракат қилган. Бироқ улар  тарқалиб, жиноят жойидан қочишга муваффақ бўлган.

Ҳозирда мазкур номаълум шахсларни аниқлаш, келгусида уларнинг ушбу ноқонуний ҳаракатига қонуний баҳо бериш юзасидан тезкор суриштирув тадбирлари олиб борилмоқда.

Аввалроқ Ангренда 25 ёшли йигит юк поездига ортилган кўмирдан қарийб 1 тонна ўғирлагани аниқлангани ҳақида хабар берилган эди.