Mobiuz техник имкониятларини янада кенгайтирмоқда
Оператор 10 ой ичида 1200 дан ортиқ янги ва модернизация қилинган таянч станцияларини ишга туширди ҳамда инвестиция лойиҳаларини амалга оширишга тайёрланмоқда.
Mobiuz мобил алоқа операторини ривожлантириш стратегияси барқарор ўсишга ҳамда абонентлар учун янги технологиялар ва имкониятларни жорий этишга қаратилган. 2019—2021 йилларга мўлжалланган ривожланиш концепцияси доирасида компания республикадаги тармоқлар қамровини кенгайтириш ва сиғимини оширишга муваффақиятли тарзда сармоя киритмоқда.
Жорий йилнинг январидан октябригача бўлган даврда оператор 1 200 дан ортиқ янги ва модернизация қилинган база станцияларини эфирга улади. Шу билан бирга, 4G LTE тармоғи ҳар куни қамров доирасини кенгайтирмоқда: 2019 йилда у йирик шаҳарларда, вилоят ва туман марказларида ва бир қатор қишлоқларда амал қилган бўлса, эндиликда чекка ҳудудларга тўртинчи авлод тармоғини олиб кириш устувор вазифа сифатида қаралмоқда.
Бу йили Олтинкўл тумани Жалобек ҚФЙ (Андижон вилояти), Бухоро тумани Новметан қишлоғи (Бухоро вилояти), Мирзачўл тумани Мирзадала қишлоғи (Жиззах вилояти), Учкўприк тумани Турғок қишлоғи (Фарғона вилояти), Хатирчи тумани Янгиробот қишлоғи (Навоий вилояти) ва бошқа кўплаб аҳоли пунктлари аҳолиси Mobiuz’нинг 4G LTE тармоғидан фойдалана бошлади.
Давлатимиз раҳбарининг 2020 йил 8 августда қабул қилинган «2020—2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари тўғрисида»ги фармони ижроси доирасида Сўхдаги алоқа сифатини яхшилашга катта эътибор қаратилмоқда. Бу ерда иккита 3G таянч станцияси ишга туширилди ҳамда LTE ускуналарини ўрнатиш бўйича тайёргарлик ишлари олиб борилмоқда. Бундан ташқари, келгуси йилда ушбу ҳудудни янада яхши қамраб олиш учун иккита янги таянч станциясини ўрнатиш режалаштирилган.
Маълумотларни узатиш хизмати сифатини янада ошириш мақсадида компания ташқи Интернет-канални кенгайтириб бормоқда – жорий йилнинг январь ойига нисбатан унинг имкониятлари 36,4 фоизга ўсди. Шу билан бирга, компания мутахассислари Mobiuz’нинг халқаро Интернет-каналига тўғридан-тўғри уланишини таъминлаш учун Халқаро пакетли коммутация марказини яратиш устида иш олиб боришмоқда.
Компаниянинг техник ривожланиши ва республикамиз ҳудудларида LTE’ни фаол равишда жорий этиш бўйича амалга оширилаётган ишлар транспорт тармоғини ҳам албатта қамраб олди. Йил давомида янги таянч станциялар учун радиореле (RRL) интервалларини қуриш ишлари олиб борилмоқда. Яқин муддатларда Ceragon компаниясининг (Исроил) ускуналарини ўрнатган ҳолда 9 та вилоятда RRL интервалларини модернизация қилиш режалаштирилган.
«Коронавирус пандемияси ва карантини, шубҳасиз, иш жараёнларимизга таъсир кўрсатди. Шу билан бирга, Mobiuz техник мутахассислари ўз фаолиятини барча санитария талабларига риоя қилган ҳолда, аммо узилишларсиз амалга оширдилар. Шу туфайли биз ўз режаларимизни бажара олдик. Айни пайтда Mobiuz алоқа операторини техник ривожлантириш учун ХХР томонидан ажратилган 150 миллион долларлик имтиёзли кредит маблағларидан фойдаланиш бўйича йирик инвестиция лойиҳасини амалга оширишга тайёрланяпмиз. Шу ойда Huawei компанияси (ХХР) ускуналарнинг биринчи йирик партиясини етказиб бериши кутилмоқда», — деди Mobiuz компаниясининг жамоатчилик билан алоқалар бўйича расмий вакили Сардор Тожиев.
Mobiuz таянч станцияларни ишга тушириш бўйича олиб борилаётган ишлар тўғрисида абонентлар ва кенг жамоатчиликни хабардор қилиб келмоқда. Объектларнинг манзиллари тўғрисидаги маълумотлар компаниянинг ижтимоий тармоқлардаги расмий каналлари ва саҳифалари, хусусан, Instagram’даги @mobiuz.uzbekistan аккаунтида жойлаштириб борилмоқда.
Реклама ҳуқуқи асосида
