Ўзбекистон фуқаролари Финляндияга ишга юборилиши мумкин

Ўзбекистон Бандлик ва меҳнат муносабатлари вазирлиги, Ташқи меҳнат миграцияси агентлиги, Финляндия вазирлик ва идоралари, Ўзбекистоннинг Латвиядаги элчихонаси вакиллари ҳамда Финляндиянинг мамлакатдаги фахрий элчиси ўртасида видеоконференцалоқа шаклида учрашув ташкил этилди, деб хабар беради ЎзА.

Эслатиб ўтамиз, 2019 йилда Финляндия миграция хизмати Ўзбекистоннинг 140 фуқаросини мамлакатдан чиқариб юбориш ҳақида қарор қабул қилгани маълум бўлганди. Бунга ўзбекистонликлар Европада ишга кириш учун кўрсатган қурилиш техникумининг сохта дипломлари сабаб бўлган. Шунингдек, Финляндиянинг Yle нашри яқин кунларда яна 219 нафар Ўзбекистон фуқароси депортация қилинишини ёзганди.

Видеоконференция шаклида ўтказилган учрашувда депортация жараёнида иштирок этган Ўзбекистон фуқаролари билан боғлиқ ҳозирги вазият ва ушбу ҳолатларнинг олдини олиш чораларини кўриш, Финляндия меҳнат бозори эҳтиёжларининг бугунги кундаги ҳолати ва меҳнат мигрантларининг ушбу мамлакатга кириш тартиби, икки давлат ўртасида ҳукуматлараро битим тузиш имкониятлари муҳокама қилинган.

Шунингдек, турли ноқонуний меҳнат миграциясини олдини олиш мақсадида Финляндия меҳнат бозори эҳтиёжларини ҳисобга олиб, ташкиллаштирилган ҳолда Ўзбекистон фуқароларини Финляндияда иш билан таъминлаш борасида ҳамкорлик қилиш таклиф этилган.

«Финляндия томони коронавирус инфекциясининг тарқалиши оқибатида мамлакатда ишсизлик даражаси икки бараварга ошиб, айни пайтда 400 минг аҳоли ишсиз қолганини таъкидлади. Шунингдек, меҳнат бозорининг босқичма-босқич тикланиши тўғрисида хабар бериб, коронавирус пандемияси билан боғлиқ вазият эртароқ барқарорлашишига умид билдирди», — дейилади хабарда.

Финляндияда миграция оқими асосан 2010 йилда бошланган бўлиб, ўзбекистонлик меҳнат мигрантларининг кириб келиши 2018 йилга тўғри келади. Пандемия пайтида ушбу давлатда хизмат кўрсатиш соҳаси энг кам зарар кўрган, аммо шу билан бирга қурилиш ва ҳунармандчилик соҳаларида ишчи кучига талаб кескин камайган.

Бундан ташқари, учрашув якунида Финляндия томони дипломатик каналлар орқали Финляндия меҳнат бозори ҳолатини таҳлил қилиш натижалари ва талаб қилинадиган бўш иш ўринларини топиш мумкин бўлган сайтлар ҳаволаларини тақдим этишга ваъда берган. Чет эллик ишчиларни Финляндияда иш билан таъминлаш бўйича ўрнатилган механизмлар мавжудлиги ва ўз қонунчилиги доирасида Ўзбекистон билан меҳнат миграцияси соҳасида ҳамкорлик масаласини кўриб чиқишини маълум қилди.