Абдулазиз Комилов Тошкентда Абдулло Абдуллони қабул қилди. Ўзбекистон Афғонистонни интеграцион жараёнларга жалб этишни муҳим деб ҳисоблайди

11 ноябрь куни Ўзбекистон ташқи ишлар вазири Абдулазиз Комилов Афғонистон Олий миллий ярашув кенгаши раиси Абдулла Абдулла билан учрашди. Бу ҳақда вазирлик матбуот хизмати хабар берди.

Маълум қилинишича, суҳбат чоғида турли соҳалардаги кўп қиррали Ўзбекистон—Афғонистон муносабатлари ҳолати ва уларни янада фаоллаштириш истиқболлари муҳокама қилинган. Афғонистонда мустаҳкам тинчлик ўрнатиш ҳамда минтақавий хавфсизликни таъминлашнинг муҳим жиҳатлари юзасидан фикр алмашилган.

«Транспорт, логистика, энергетика, савдо ва таълим соҳаларида инвестиция ва инфратузилма лойиҳаларини биргаликда амалга ошириш орқали икки мамлакат ўртасидаги савдо-иқтисодий ҳамкорликни чуқурлаштириш масалаларига алоҳида эътибор қаратилди», — дейилади хабарда.

Афғонистонда тез орада тинчлик ва барқарорликка эришиш учун мазкур мамлакатни Марказий Осиёдаги интеграция жараёнларига жалб қилишни жадаллаштиришнинг муҳимлиги қайд этилган.

Таъкидланишича, музокараларда икки томон кун тартибининг ўзаро манфаатли бошқа масалалари ҳам кўриб чиқилган.

Аввалроқ Шавкат Мирзиёев ШҲТни Афғонистонга кўмак бериш бўйича режани қабул қилишга чақиргани тўғрисида хабар берилганди.