Болливуднинг ёш юлдузи Харшали Малҳотра «Бажранги оға» фильмидаги роли билан томошабинларга яхши таниш. Кичик бўлишига қарамай ўзига яраша истеъдоди бўлган ёқимли табассум эгаси ҳақида маълумот бериб ўтамиз.
Харшали Малҳотра 2008 йил 3 июнда дунёга келган. Ёқимтой қизалоқ карьерасини модель сифатида бошлаган ва реклама роликларида ва телевидениеда суратга тушган. Кейинроқ унга турли сериалларда суратга тушиш таклифи келиб туша бошлаган. Шундан кейин «Ризолик», «Жодха ва Акбар» ва бошқаларда роль ижро қилган.
2015 йилда суратга олинган «Бажранги оға» фильмидаги Муни роли унга машҳурлик олиб келган. Фильм режиссёри Кабир Хан Малҳотрани кўплаб ролга даъвогарлар орасидан танлаб олган.
Унда Харшали 6 яшар покистонлик соқов қиз ролини ижро қилган. Катталар ҳам вақти келса бундай қойиллатиб ижро қилолмайдиган ролидан кейин у 2016 йилда Zee Cine Awards’да энг яхши дебютант актриса йўналиши бўйича мукофотни қўлга киритган.
Фильмда бирга суратга тушган актёр Салмон Хон қизалоққа қаттиқ боғланиб қолган ва унинг келгуси таълими учун ҳомийлик қилган.
Қизнинг онаси киносаноатда продюсер сифатида яхши маълум бўлган Кажал Малҳотра ҳисобланади. Харшали «Прем Ратан Дҳан Паё» лойиҳасида роль ижро қилишга тасдиқланган бўлган, аммо «Бажранги оға» фильмидаги муваффақиятдан кейин онаси ва Салмон Хон «Прем Ратан Дҳан Паё» карьера борасида ортга қадам ташлаш, деб ҳисоблаб, келишган ҳолда уни бошқа актриса билан алмаштиришга қарор қилган.
Онаси қизини юлдузга айлантиришга ҳаракат қилмаслиги, уйда оддий тарбия бериши ва мактабда бошқа болалардек таълим олишини айтади. «Бажранги оға»да соқов қаҳрамонни гавдалантирганига қарамай, ҳаётда уни гапиришдан тўхтатиш қийин, деб қўшимча қилади.
Айни вақтда Малҳотра иштирокидаги янги лойиҳалар йўқ бўлса ҳам мухлислар унинг келажакда Болливудда ўз ўрнига эга ижодкор бўлишига ишонади.
Изоҳ (0)