Президент эътироф этган Қоракўлдаги халқаро математика мактабининг навбатдаги филиали Қашқадарёда очилиши мумкин

Президент Шавкат Мирзиёев эътирофига сазовор бўлган Қоракўлдаги халқаро математика мактабининг бугунги кунда Сирдарё, Навоий ва Тошкент вилоятида филиаллари бор. Мактабнинг навбатдаги тўртинчи филиали Қашқадарё вилоятида ташкил этилиши мумкин, дея хабар берди «Дарё» мухбири.

Таъкидланишича, бундай ташаббусни Деҳқонобод туман халқ таълими бўлими мудири Бахтиёр Юсупов халқаро математика мактаби директори Темур Рўзиев билан суҳбатда ўртага ташлаган.

«Мактабимизнинг республика миқёсида 3 та филиали бор. Филиалларимиз Сирдарё, Навоий ва Тошкент вилоятининг Оҳангарон шаҳрида ташкил этилган бўлиб, ўқув жараёнлари энди бошланди», — дейди мактаб директори Темур Рўзиев.

2020 йил 23 октябрь куни халқаро математика мактабида бўлган Деҳқонобод туман халқ таълими бўлими тасарруфидаги мактаб директорлари ва фаол ўқитувчилар мактаб тажрибасини ўрганган. Деҳқонобод туман ХТБ мудири Бахтиёр Юсупов эса мактаб директори ва жамоасига навбатдаги филиални Деҳқонободда ташкил этиш таклифини ўртага ташлаган.

Мазкур таклифга жавоб берган халқаро математика мактаби директори «Агар вилоят раҳбари ва туман ҳокими сизларни қўллаб-қувватласа ва ихтисослаштирилган мактаб интернат ташкил этилса, биз сизлар билан ишлашга ҳамда навбатдаги филиални Деҳқонободда ташкил этишга тайёрмиз», деган.

Эслатиб ўтамиз, Президент Шавкат Мирзиёев ўқитувчи ва мураббийлар байрамига бағишланган табригида «Қоракўл мактаби биз учун замонавий мактабнинг ҳақиқий андозаси эмасми? Нима учун Халқ таълими вазирлиги унинг ноёб тажрибасини етарлича оммалаштирмаяпти? Нима учун бошқа мактаб директорлари бу таълим даргоҳидан ибрат олмаяпти? Халқ таълими вазири Шерзод Шерматов нега уч йилдан буён бу жиддий масалага етарлича эътибор бермаяпти? Афсуски, ҳаммамиз олдингдан оққан сувнинг қадри йўқ, деб, бепарво бўлиб юрибмиз. Нима учун бошқа вилоятларда, дейлик, Андижонда, Фарғона, Самарқанд, Хоразм ёки Қаршида, Жиззах ва Сирдарёда бундай мактаблар йўқ?

Ваҳоланки, бугунги кунда бизга мана шундай юзлаб мактаблар, ўз касбининг чинакам устаси ва фидойиси бўлган минглаб мураббийлар сув билан ҳаводай зарур. Шу муносабат билан Халқ таълими вазирлиги ҳудудлар раҳбарлари билан биргаликда ҳар бир туманда камида биттадан мана шундай мактаб яратиш чораларини кўриши зарур», дея таъкидлаб ўтганди.

Президентнинг мазкур огоҳлантиришидан сўнг, Қашқадарё вилоят халқ таълими бошқармаси масъуллари ва тизим вакиллари билан мулоқот қилган Зоир Мирзаев «Мактаб директорлари Қоракўлдаги мактабга бориб, тажриба орттирсин, янгилик қилсин. Ҳар бир туман ва шаҳарда математика, кимё, биология фанларига ихтисослашган мактаблар ташкил қилайлик. Таълимда янгилик қиладиган вақт келди», деганди.

Ўшанда Зоир Мирзаев вилоятда математика, кимё, биология фанларига ихтисослашган мактаб ташкил қилиб, яхши натижа кўрсатган мактаб директорларига ойлик маошидан ташқари вилоят ҳокимлиги томонидан ҳар ой 5 миллион сўмдан мукофот берилишини қўшимча қилганди.