Тожикистон раҳбари Эмомали Раҳмон навбатдаги президентлик сайловларида 90,9 фоиз овоз билан ғалаба қозонди. Собиқ Иттифоқ республикаларининг амалдаги етакчилари орасида у ҳаммадан кўп президенлик қилиб келмоқда. «Коммерсантъ» нашри собиқ СССР мамлакатларининг узоқ умр кўрган президентларига оид маълумотлар билан бўлишди.
Қозоғистоннинг собиқ президенти Нурсултон Назарбоев
У мамлакатни 28 йил-у 10 ой ва 24 кун давомида бошқарган — 1990 йилнинг 24 апрелидан 2019 йилнинг 20 мартига қадар. Назарбоев лавозимдан кетганига қарамай Қозоғистон Хавфсизлик кенгаши раҳбари, «Нур Отан» партияси раиси ва республика Конституцион кенгаши аъзоси ҳисобланади. 2010 йилда унга «Элбоши» унвони топширилган.
Тожикистон президенти Эмомали Раҳмон
27 йил 10 ойдан буён лазовимда — 1992 йилнинг 27 ноябридан бошлаб (Олий кенгаш раиси сифатида). 1994 йилдан — президент. 2015 йилда «Тинчлик ва миллий бирлик асосчиси — Миллат етакчиси» унвонига эга бўлган.
Ўзбекистоннинг Биринчи Президенти Ислом Каримов
26 йил-у 5 ой ва 9 кун лавозимда ўтирган — 1991 йилнинг 31 августидан бошлаб 2016 йилнинг 2 сентябрига қадар.
Беларусь президенти Александр Лукашенко
26 йил 2 ойдан буён лавозимда — 1994 йил 20 июлдан бери. 2020 йил 9 августдаги президентлик сайловларидан сўнг мамлакатда Лукашенкога қарши оммавий норозиликлар давом этмоқда. Намойишчилар уни сайлов натижаларини сохталаштиришда айбламоқда (расмий маълумотларга кўра, у 80,1 фоиз овоз тўплаган).
Озарбайжон президенти Илҳом Алиев
16 йил 11 ойдан буён лавозимда — 2003 йилнинг 31 октябридан бери. Алиев даврида 2008 йили референдум ўтказилган бўлиб, унда президентнинг икки маротабагина сайланиши тўғрисидаги чеклов олиб ташланган. 2016 йилда эса янги конституцион референдум президентлик муддатини беш йилдан етти йилга узайтирган (бунинг ташаббускори Илҳом Алиевнинг ўзи).
Россия президенти Владимир Путин
16 йил 9 ойдан буён лавозимда — 2000 йил 7 майдан бери (1999 йил 31 декабрдан президент вазифасини бажарувчи). 2008 йилдан 2012 йилга қадар бош вазир лавозимида фаолият юритган.
Туркманистоннинг собиқ президенти Сапармурот Ниёзов
15 йил 1 ой лавозимда ўтирган — 1991 йилнинг 27 октябридан 2006 йил 21 декабрда юрак етишмовчилигидан вафот этгунига қадар. 1999 йилда «Туркманбоши» (барча туркманларнинг отаси) номига сазовор бўлган.
Қирғизистон собиқ президенти Асқар Акаев
14 йил 4 ой лавозимга ўтирган — 1990 йилнинг 27 октябридан 2005 йилнинг 11 апрелига қадар. «Лола инқилоби» сабаб президентликдан кетган ва Россияга қочишга мажбур бўлган.
Туркманистон президенти Губангули Бердимуҳамедов
13 йил 9 ойдан буён ушбу лавозимда — 2007 йил 14 февралда сайланган (2006 йил 21 декабрдан вақтинча бажаравчи). 2015 йилда Ашхободда Бердимуҳамедовга атаб ҳайкал ўрнатилган.
Грузия собиқ президенти Эдуард Шеварнадзе
11 йил лавозимда ўтирган — 1992 йилнинг 6 ноябридан 2003 йилнинг 23 ноябрига қадар. «Атиргул инқилоби» сабаб истеъфога чиққан. Мамлакатда қолган, бироқ сиёсат билан бошқа шуғулланмаган. 2014 йилнинг 7 июль куни вафот этган.
Изоҳ (0)