Ўзбекистон Марказий банки 2020 йилнинг 9 ойидаги ички валюта бозоридаги ҳолат ва йил якунига қадар кутилаётган тенденциялар юзасидан маълумот берди.
Қайд этилишича, сўнгги икки ой давомида карантин билан боғлиқ чекловларнинг юмшатилиши ҳамда иқтисодий фаолликнинг аста-секинлик билан тикланиб бориши таъсирида ички валюта бозорида хорижий валютага бўлган талабнинг нисбатан юқори даражада бўлиши кузатилди. Бу, асосан, карантин шароитларида қондирилмаган талабнинг маълум бир кечикиш орқали юзага чиқиши билан изоҳланган.
2020 йилнинг январь—сентябрь ойлари давомида ички валюта бозорида хўжалик юритувчи субъектлар томонидан жами 10,7 миллиард долларлик хорижий валюта сотиб олинди.
«Мазкур даврда ички валюта бозорида хорижий валютадаги умумий таклиф ҳажми 7,0 миллиард долларни ташкил этиб, қолган 3,7 миллиард долларлик талаб эса Марказий банкнинг интервенсиялари ҳисобига тўлиқ қондирилди», — дейилади маълумотда.
Таъкидланишича, ҳисобот даврида ички валюта бозоридаги Марказий банкнинг интервенсиялари олтин-валюта захираларининг нейтраллиги тамойилига асосланган ҳолда, маҳаллий ишлаб чиқарувчилардан сотиб олинган олтин миқдори доирасида амалга оширилди.
«Марказий банк келгуси октябрь—декабрь ойлари давомида ҳам ушбу тамойилга асосан ички валюта бозорига интервенсияларни амалга ошириб боради. Бунда ички валюта бозорида хорижий валютага бўлган талабнинг сезиларли даражада ошиши кузатилган ҳолатларда заруриятга қараб, йил бошидан олтин хариди ва амалга оширилган интервенсия операциялари ўртасидаги тафовутдан ҳосил бўлган 300 миллион доллар миқдоридаги валюта захираси ҳам ушбу мақсадларга йўналтирилиши мумкин», — дейилади Марказий банк маълумотида.
Изоҳ (0)