Ижтимоий тармоқларда такси ҳайдовчиси ЙПХ ходимини машина капотида олиб кетаётгани акс этган видео тарқалди. ИИВ Йўл ҳаракати хавфсизлиги бош бошқармаси (ЙҲХББ) ахборотига кўра, воқеа 7 август куни Сурхондарё вилояти маъмурий маркази Термиз шаҳрида юз берган.
Вилоят ИИБ Пост-патруль хизмати ва жамоат тартибини сақлаш бошқармаси ППХ батальони 1-отряд сафдор ходими Ш.Раҳимов ҳамда вилоят ИИБ ЙҲХБ Йўл-патруль хизмати отряди 1-сафарбар гуруҳи инспектори сафдор Ш.Назаров тасдиқланган режага асосан Термиз шаҳри Ислом Каримов кўчасида хизмат олиб бораётган вақтда Matiz машинаси светофорнинг тақиқланган чироғида ҳаракатланиб келгани учун тўхтатилган.
ЙПХ ходими ўзини таништириб, ҳайдовчидан автомашинани четга олишини ва ҳужжатларини тақдим этишини сўраган. Шунда ҳайдовчи ЙПХ ходимининг қонуний талабига бўйсунмай, йўлини тўсиб чиққан ППХ ходимининг устига қараб ҳаракатланган. ППХ ходими машинанинг капотига осилиб қолганига қарамай, 1983 йилда Термиз шаҳрида туғилган ҳайдовчи У.К. ҳаракатни давом эттирган.
ЙҲХББ томонидан тақдим этилган видеода қарама-қарши йўналишда ҳаракатланиб кетаётган Labo ҳайдовчиси Matiz’нинг йўлини тўсиб, такси ҳайдовчисининг ноқонуний ҳаракатларига чек қўйишга урингани, бироқ Matiz ҳайдовчиси унга чап бериб, ҳаракатни давом эттирганини кўриш мумкин. Маълум бўлишича, тезлик пасайганидан фойдаланиб, ППХ ходими машина капотидан тушиб олишга муваффақ бўлган.
Қўшимча қилинишича, Matiz кўп юрмай Сурхондарё Соғлиқни сақлаш бошқармасига тегишли Damas тез ёрдам машинасига бориб урилган.
ИИВ ЙҲХББ айни пайтда мазкур ҳолат юзасидан Сурхондарё вилояти прокуратураси томонидан терговга қадар суриштирув ўтказилаётганини маълум қилди.