Ахборот ва оммавий коммуникациялар агентлиги 1 август куни бўлиб ўтган брифингда Маҳалла ва оилани қўллаб-қувватлаш вазирлиги бошқарма бошлиғи Аҳрор Ғуломов Сергели ва Хоразмдаги моддий ёрдам пули тарқатилишидаги можароли ҳолатлар юзасидан изоҳ берди.
Ўзбекистонда 30 июлдан бошлаб «темир дафтар»га киритилган эҳтиёжманд оилаларга нақд пул шаклида ёрдам маблағлари тарқатилмоқда. 1 августга ўтар кечаси ижтимоий тармоқларда ушбу маблағлар тарқатилишидаги эҳтимолий қонун бузилиши ҳолатлари ҳақида маълумотлар тарқала бошлади.
Мавзуга доир: Видео: Сергелида аҳоли ва маҳалла маъмурияти ўртасида 1 млн сўмлик нақд пул ёрдами устида юзага келган можаро
Видеоларнинг бири Тошкент шаҳар Сергели тумани «Ҳумо» маҳалласида олинган бўлиб, унда ёрдам пули масаласида маҳалла аҳли ва маъмурият ўртасида низо келиб чиққанини кўриш мумкин.
Видеода аҳоли вакили маҳалла раҳбариятини ногиронлиги бор шахсга ёрдам пулини бермаётганликда айблаган. Унинг сўзларига кўра, маҳалла маъмурияти эҳтиёжмандларга ажратилган маблағни сўраб келганларга банкдан кредит олишни тавсия қилган. Айни ҳолатга алоқадор бошқа бир видеода ички ишлар ходимлари маҳалла маъмурияти вакилларини аҳолидан ҳимоя қилишга уринаётгани кўринади.
Шунингдек, ижтимоий тармоқларда Хоразм вилоятига дахлдор экани айтилаётган яна бир видео тарқалган. Муаллифи кўринмаган видеода камера ортидан гапирган шахс 700 минг сўм ёрдам пули олгани, аммо дастлаб конвертда 1 млн сўм бўлгани, 300 минг сўмни тарқатувчилар ушлаб қолганини айтади.
«700 минг сўм. Конвертни очганда ҳақиқатан ҳам унда 1 миллион сўм бўлган, лекин маҳалла ва ҳокимлик вакиллари: ‘Агар 300 минг сўмдан ташлаб кетмасаларинг, биз кейинги сафар пул тарқатилганда сизларни рўйхатдан олиб ташлаймиз’, деб қўрқитиб, 300 минг сўмдан пулларини олишган», — дейди видео муаллифи.
Маҳалла ва оилани қўллаб-қувватлаш вазирлиги вакили ушбу ҳолатлар вазирлик раҳбарияти томонидан Ички ишлар вазирлиги билан бирга қатъий назоратга олинганини маълум қилди.
Фармон билан белгиланган эҳтиёжманд ва ночор оилаларга пул маблағларини тарқатиш масалаларида Хоразм вилояти ва Сергели тумани бўйича ижтимоий тармоқларда тарқалган ҳолатлардан Маҳалла ва оилани қўллаб-қувватлаш вазирлигининг хабари бор.
Ушбу ҳолатлар вазирлик раҳбарияти томонидан Ички ишлар вазирлиги билан бирга қатъий назоратга олинган. Ҳеч қандай хавотирга ўрин йўқ. Барча ҳолатлар ўрганилмоқда.
Қонун бузилиши ҳолатлари тасдиқланадиган бўлса, айбдорларга нисбатан албатта ўрнатилган тартибда чоралар кўрилади.
Аҳрор Ғуломов, Маҳалла ва оилани қўллаб-қувватлаш вазирлиги бошқарма бошлиғи
