Ўзбекистонда 2021 йил охиригача 3 минг гектар интенсив боғ яратилади ва 2,5 мингта оилага бўлиб берилади

Ўзбекистонда 2021 йил якунигача 3 минг гектарда плантация шаклида интенсив боғлар барпо этилиб, янги тартиб асосида аҳолига 1-1,5 гектардан тарқатган ҳолда, 2-2,5 минг оиланинг бандлиги таъминланади. Бу ҳақда Президент Шавкат Мирзиёев 23 июль, пайшанба куни ўтказилган видеоселектор йиғилишида топшириқ берди.

Қайд этилишича, мева-сабзавотчилик кооператив ва кластерлари фаолиятини қўллаб-қувватлаш учун 212 миллион доллар ажратилиши белгиланган.

Президент ички бозорни арзон маҳсулотлар билан таъминлаш, «даладан истеъмолчигача» тизимини жорий этишда мева-сабзавотчилик кластерлари асосий драйвер бўлиши кераклигини таъкидлади.

Шу боис, ажратилаётган маблағни тўғри йўналтириб, бир сўмни икки сўм қиладиган лойиҳаларни ишлаб чиқиш, бунинг учун маҳсулотларни қайта ишлаш, сақлаш ва экспортга тайёрлаш қувватларини оширишга алоҳида аҳамият қаратиш зарурлиги айтилди.

Туманларни қишлоқ хўжалиги маҳсулотлари етиштиришга ихтисослаштириш масаласи ҳам кўриб чиқилди. Бу борада Жиззах вилояти намуна бўлиб, келгуси уч йилда вилоятда қарийб 120 минг гектарга яқин ер ўзлаштирилиши, боғ ва токзорлар ташкил қилиниб, мойли экинлар экилиши режалаштирилган.

Бу тажрибани босқичма-босқич барча ҳудудларда жорий қилиш, ҳар бир туманда кўпи билан 3-4 та экспортбоп ва юқори даромад берувчи маҳсулот етиштиришни йўлга қўйиш зарурлиги қайд этилди.

Эслатиб ўтамиз, Шавкат Мирзиёев 2019 йил 5 ноябрда ўтказилган йиғилишда хорижий мутахассислар кўмагида ташкил этилган Сурхондарё тажрибаси асосида 55 та туманни экспортбоп мева-сабзавот маҳсулотлари турини етиштиришга ихтисослаштириш вазифасини қўйганди.

Шунингдек, Президент томонидан 2019 йил 9 декабрь куни ўтказилган йиғилишда мамлакатда мева-сабзавотчиликда кластер тизимини йўлга қўйиш бўйича топшириқ берилган.