АҚШ президенти «Россия иши» бўйича судланган дўсти ва маслаҳатчиси Рожер Стоунга белгиланган жазони енгиллаштирди

АҚШ президенти Дональд Трамп ёлғон кўрсатма беришда айбланган қадрдон дўсти ва маслаҳатчиси Рожер Стоунга белгиланган жазони енгиллаштирувчи қарорни имзолади. Бу ҳақда Оқ уй сайтида маълум қилинди.

«Рожер Стоун етарли даражада жабр кўрди. Унга нисбатан ушбу ишга алоқадор бошқалар каби жуда адолатсиз муносабатда бўлинди. Рожер Стоун энди озод инсон!», — дейилади Оқ уй баёнотида.

Гап афв ҳақида эмас, қамоқ муддатини қисқартириш ҳақида кетмоқда. Шундай қилиб, 67 ёшли Рожер Стоуннинг судланганлиги бекор бўлмайди, бироқ у энди жазони ўташи шарт эмас.

Трамп бу каби қарорни апелляция суди Стоуннинг 40 ойлик қамоқ муддати бошланишини кечиктириш тўғрисидаги аризасини рад этганидан сўнг қабул қилган. Стоун 14 июль куни қамоқхонага етиб келиши керак эди.

АҚШ Демократлар партияси вакиллари Трампнинг ушбу ҳаракатини «қонун устуворлигига тажовуз қилиш» деб атамоқда.

Февраль ойида Рожер Стоун ёлғон кўрсатма бериш, гувоҳга босим ўтказиш ва Конгресс терговига халақит беришга айбдор деб топилганди. Унга нисбатан айблов Россиянинг 2016 йили АҚШда бўлиб ўтган президентлик сайловларига аралашувини тергов қилган махсус прокурор Роберт Мюллер томонидан эълон қилинган. Дастлаб Стоунга 7 йилдан 9 йилгача қамоқ жазосига ҳукм қилиш сўралган. Трамп ўзининг Twitter’ида бу тавсияни танқид қилиб, таклиф қилинган ҳукмни «даҳшатли ва инсофсиз» деб айтган эди.