Соғлиқни сақлаш вазирлиги 23 май куни бозорлар ходимларини оммавий тестдан ўтказиш жараёнида Тошкентдаги «Ўрикзор» бозоридаги сотувчиларнинг бирида коронавирус аниқланганини маълум қилган эди. Шундан сўнг савдо мажмуаси ўша куннинг ўзидаёқ вақтинча ёпилган эди.

Вазирлик маълумотларига кўра, 30 май, шанба куни Тошкент шаҳрида аҳоли орасида 11 кишида, жумладан, «Ўрикзор» бозоридаги коронавирусга чалинган сотувчининг ўғли ва қизида ҳам коронавирус инфекцияси аниқланган.

«Айни вазиятдан маълум бўладики, ҳар бир фуқаро, аввало, карантин қоидаларига қатъий риоя этишлари лозим. Зарурат юзасидан кўчага чиқиб, уйга келганингизда ҳам қўлингизни совунлаб, қайта-қайта ювинг. Қўл бериб саломлашиш, қучоқ очиб кўришишдан тийилиш лозим. Энг муҳими, ижтимоий масофани сақланг, жамоат ва одамлар тўпланган жойлардан узоқроқ юринг, доимо тиббий ниқоб тақиб юришни унутманг. Акс ҳолда нафақат ўзингиз, балки оила аъзоларингиз, яқинларингиз соғлигини ҳам жиддий хавф остида қолдиришингиз мумкин», — дея огоҳлантирмоқда ССВ.

30 май соат 23:00 ҳолатига кўра Ўзбекистонда 3546 кишида коронавирус аниқланган, уларнинг 2783 нафари соғайган. Айни вақтда 749 нафар бемор даволанмоқда, улардан олти нафарининг аҳволи оғир, яна бирининг аҳволи ўта оғир.

Эслатиб тўтамиз, мамлакатдаги амалдаги карантин чекловлари 15 июнга қадар узайтирилди. Айни вақтда 1 июндан бошлаб карантин даражасидан келиб чиққан ҳолда айрим фаолият турларига рухсат берилди.

Ижтимоий масофа сақлаш, ниқоб тақиш ҳамда бир қатор муассаса ва объектлар фаолиятига тақиқ сингари чеклов ва талаблар Ўзбекистоннинг барча ҳудудларида сақланиб қолади. Шахсий автомобилларда вилоятлараро қатнашга тақиқ ҳам ҳозирча бекор қилинмайди.