Бош прокуратура академияси ташкил топгандан буён ўтган икки йил мобайнида академияда олти минг нафарга яқин ҳуқуқни муҳофаза қилиш органлари ва давлат хизматчилари таҳсил олди. Бу ҳақда Бош прокуратура академияси маълум қилди.
Ўзбекистон Президенти Шавкат Мирзиёевнинг 2018 йил 8 майдаги «Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида»ги фармонига асосан ташкил Бош прокуратура академияси ташкил этилган.
Фармонга мувофиқ ўқитишнинг эски, сийқаси чиққан шакл ва усуллари тубдан қайта кўриб чиқилиб, босқичма-босқич замонавийлаштирилди. Биринчи марта прокуратура органларининг ҳар бир ходими уч йилда камида бир марта ўқиши шартлигини белгиловчи тартиб ўрнатилди. Ўтган икки йил давомида академияда жами 10 мингдан ортиқ тингловчилар таълим олди.
Академия олдига давлат органлари ва ташкилотлар ходимларининг ҳуқуқбузарликлар профилактикаси, жиноятчилик ва коррупцияга қарши курашиш ҳамда ҳуқуқни муҳофаза қилиш фаолиятининг бошқа масалалари бўйича малакасини ошириш асосий вазифа қилиб қўйилган.
Ўтган давр мобайнида 6 минг нафарга яқин ҳуқуқни муҳофаза қилиш органлари ва давлат хизматчилари академияни тамомлади. Шунингдек, 2019/2020-ўқув йилидан бошлаб магистратура мутахассисликлари бўйича кадрлар тайёрлаш йўлга қўйилиб, магистратураси негизида «Коррупцияга қарши курашиш» йўналиши бўйича тор доирадаги мутахассислар тайёрланмоқда. Уч мутахассислик бўйича фалсафа доктори (PhD) ва фан доктори (DSc) илмий даражаларини бериш бўйича Илмий кенгаш фаолият кўрсатмоқда.
Асосий иш жойидан ажралмаган ёки қисман ажралган ҳолда таълим олишга мўлжалланган «ProAcademy» ахборот-таълим электрон портали ишга туширилиб, унинг воситасида ўтган давр мобайнида 4717 нафар ходим ўқитилди.
Ўқув дастурлари махсус хоналар (полигонлар) суд жараёнларини моделлаштириш, ҳодиса содир бўлган жойни кўздан кечириш ва бошқа амалий машғулотларни ҳақиқий шароитларга яқинлаштирилган ҳолда ўтказиб келинмоқда.
Коронавирус инфекцияси тарқалишига оид эпидемиологик ҳолат билан боғлиқ карантин чоралари жорий этилиши натижасида академияда барча йўналишлар бўйича таълим дастурлари тўлиқ масофавий таълим режимига ўтказилди.
Изоҳ (0)