Молия вазирлиги Республика бўйича коронавирусга қарши кураш тадбирлари учун жалб қилинган ходимларга махсус рағбатлантириш ва ҳар кунлик қўшимча тўловларнинг тўланиши тўғрисида маълумот берди.

Фото: Соғлиқни сақлаш вазирлиги

Қайд этилишича, 7 май ҳолатига кўра, коронавирусга қарши курашаётган 15 минг 825 нафар тиббиёт ходимларига 54,9 миллиард сўм тўланган.

Президентнинг «Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида»ги фармонига асосан, тиббиёт, санитария-эпидемиологик ва бошқа ходимлар коронавирус инфекцияси тарқалишига қарши курашиш тадбирларига жалб қилинадиган даврда уларнинг ойлик лавозим маошига 6 фоиз миқдорида ҳар кунлик қўшимча тўловлар белгиланган.

Шунингдек, Президент қарори билан коронавирус инфекциясидан зарарланган беморлар билан мулоқотга киришадиган, зарарланган беморлар жойлаштирилган объектларда ҳамда коронавирус инфекциясини аниқлаш лабораторияларида фаолият олиб бораётган тиббиёт, санитария-эпидемиология хизмати ва бошқа ходимларга ҳар 14 кунлик фаолият даври учун қуйидаги миқдорларда (солиқлардан ташқари) махсус қўшимча рағбатлантириш тўлови белгиланган:

  • врач ходимларга, врач-лаборантларга — 25 миллион сўм;
  • ўрта тиббиёт ходимларига, ҳамшира-лаборантларга — 15 миллион сўм;
  • кичик тиббиёт ходимларига — 10 миллион сўм;
  • бошқа ходимларга — 5 миллион сўм.

Шунингдек, коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.

Молия вазирлиги маълумотига кўра, ойлик лавозим маошига 6 фоиз миқдорида ҳар кунлик қўшимча тўлов олган ходимлар сони 14 минг 301 нафарни ташкил этади. Уларга жами 22 миллиард 832 миллион сўм маблағ сарфлланган. Шунингдек, 1 524 нафар тиббиёт ходими 14 кунлик фаолият даври учун махсус қўшимча рағбатлантириш тўловини олган. Уларга 32 миллиард 48 миллион сўм сарфланган.

Қуйидаги ҳаволада вазирлик мукофот пуллари тақсимоти вилоятлар, туманлар ва ҳатто, касалхоналар кесимида батафсил баён қилинган.