Хонанда Манзура интервьюсида актриса Дурдона Қурбонова 200 доллар учун клипга тушишни рад этгани тўғрисидаги гап-сўзларга ўз муносабатини билдириб, бу пулга бир ой ишлайдиган халқ артистлари борлигини таъкидлаб ўтган эди.
Актриса Дурдона Қурбонова «Дарё» мухбири Феруз Муҳаммадга берган интервьюсида хонанда Манзуранинг клипида нима учун суратга тушмаганлигига ойдинлик киритди.
Хонанда Манзура билан интервью қилганингизни билмаган эдим. Бир танишим Telegram’дан ўша интервьюни ташлаб, сиз ҳақингизда гапиришибди, кўринг деди. Интервьюни кўрдим.
‘Алдама мени’ кўрсатувига чақиришди. Бордим. Ўзи у кўрсатувга боргим келмаётган эди, нимадир бўлди-ю кўрсатувга чиққим келиб қолиб, ‘қани нима бўлар экан?’, деб чиқдим.Кўрсатувда ‘Манзура опа ҳақида гапирмайман, гапирсам хафа бўлиб қоладилар’ дедим. ‘Майли айтманғ, деб чаённи ушлашга олиб боряптилар, мен эса чаёндан жуда қўрқардим. ‘Саволга жавоб бера қолинг, ёмон нарса эмас-ку’, дедилар. Ўзи ўша кўрсатув кўп саъаткорларни бир-бирига ёмон кўрсатиб қўймоқда. Мени ҳам бир қанча санъаткорлар ушбу кўрсатувда ёмон кўришини айтиб ўтган эди.
Биласизми, бошқа жойларда интервью берсангиз тўлиқ қўйишади. У кўрсатувда мен ‘Манзура опани ҳурмат қиламан, биз ёш вақтимизда, санъатга кириб келмаган вақтларимизда, мухлиси бўлганмиз, ролларини ҳам кўрганмиз, бу ерда тушунмовчилик бўлган’ дедим.
Менга Манзуранинг клипини суратга олаётган режиссёрнинг маъмури телефон қилиб, клип олишаётганини ва унда роль ижро қилишимни айтишди. Вақтим борлигини ва гонораримни унга айтганимда эртага телефон қиламиз деди. Телефон қилиб, сизни клипга оладиган бўлдик, аммо сиз айтган пулни эмас, мана шунақа нархни берадиган бўляпмиз, деди. Мен унақа нархга клипда туша олмаслигимни айтганимдан сўнг ‘нима қилибди, Манзурани клипи-ю’, деди. Тушуняпсизми, бу ерда қандай гап кетяпти? Нима, энди Манзурани клипи экан, деб текинга тушиб кетаверишим керак экан-да, дедим.
Жуда кўп клипмейкерлар чиқишади, шунақа яхши муомала қилишадики, керак бўлса, берган пулига рози бўлиб, талашмасдан кетамиз. Мисол учун, режиссёр Икром Али клипларга чақиришади, ишонинг, улар муомалани шу даражада қилганларидан ҳаттоки пулини ҳам сўрамасдан розилик бераман, йўқ дея олмайман.
Улар ‘нима қилибди, Манзурани клипи-ю’, деганида ‘бу деганингиз билан машҳурларнинг клипида текинга тушиб кетаверишим керак экан-да’, десам, уни клипида тушсангиз, ўзингизга яхши-ку деди.
Худо берган нарса файз олади, бермаса, файз ололмайди. Мен у клип билан кўтарилиб ҳам кетмайман ёки суратга тушмасам, рейтингим тушиб ҳам кетмайди. Унинг муомаласи ёқмаганидан кейин клипга тушмайман, деб жавоб бердим.
‘Алдама мени’ бошловчисига ҳам шу гапларни гапириб бердим ва бу гапларим кесиб ташланмасин, дея алоҳида таъкидлаб ўтганман.
Манзура опа интервьюларида ‘Дурдона менинг клипимдаги ролларни ўйнай олмасди’, дебдилар. Мен умуман бошқа соҳадан келиб қолган, ҳаваскор актриса эмасман. Шу соҳада профессионал бўлиш учун коллежни ҳам айнан шу йўналишда тугатдим, олий таълимда ҳам айнан шу соҳада ўқияпман. Уларнинг айтишларича, ‘театр актрисалари бу суммага бир ойлаб ишлайди’, деяптилар. Ҳўп, унда нимага театр актрисасини клипларига чақирмадилар?
Мени ёқтирмас эканлар, чақиришаётганида хабарлари бўлмайди, хабарлари бўлади, албатта. Ҳеч қайси клипмейкер хонанданинг розилигисиз актёр ёки актриса танламайди.
Мен хафа бўлган жойим — бу суммага у кўнмаган деганлари. Улар айтяптиларки, ‘бу сумма учун одамлар ойлаб ишлайди’, деяптилар. Барча одам яхши биладики, қайсики актриса қайсидир вақтда ўзига кўпроқ гонорар белгилайди, қайсидир йилларда керак бўлса ойлаб, йиллаб роль кутишга мажбур бўлади.
Мен шу иш учун 3 йил коллежда, ҳозир олийгоҳда ўқияпман, буларнинг барчаси харажат-ку. Бунинг устига юришим, кийинишим ва яна қандайдир кутилмаган харажатларим бўлиб қолади. Уйимга ҳам нимадир орттирсам дейман. Шу касбдан оз бўлса-да моддий манфаатдорлик кўрсам, ҳеч бўлмаса уйимдагиларга оғирлигим тушмасдан ўзимни ўзим эпласам, дейман. Масалан, сёмкалардан пул йиғиб, ўз кучим билан машина олдим.
Бир кун давомида овқатланмасдан сёмкаларда юрамиз. Ҳар бир касбнинг бошқа одамлар билмайдиган қийинчиликлари бор.
Манзура опа тўйга боришади, ўн беш минут фонограмма айтишади, лекин тўрт миллион сўм олиб кетишади. Нима, актрисалар, қўпол қилиб айтганда, одам эмасми? Биз ҳам ундан кўра ўн беш минут фонограмма айтиб тўрт миллион олиб кетаверамиз.
Мен Манзура опани клипида пул учун эмас, балки клипмейкер ёрдамчисининг муомаласи ёқмаганлиги учун тушмаганман. Ҳеч қачон пулга талашмаганман, ҳаттоки ‘Миллион’ жамоасининг концертига ҳам гонорарини келишмасдан чиққанман. Кастиндан ўтганимга хурсанд бўлиб ўйнаб кетаверганман. Ҳозир ҳам пул масаласида ҳеч ким билан талашмайман.
Дурдона Қурбонова, актриса
Изоҳ (0)