Lamborghini компанияси Squadra Corsa автоспорт бўлинмаси ва Centro Stile дизайн-маркази билан ҳамкорликда яратилган янги гиперкарининг синовлари тасвирланган видео билан бўлишди, деб хабар беради Motor.
Фото: Motor
Икки эшикли гиперкар Италияда коронавирус сабаб карантин эълон қилинишидан бир неча ҳафта олдин синовдан ўтказилганди.
Аввалроқ Aventador SVR деб аталган гиперкар расмий хабарларда Lamborghini V12 номи остида эълон қилинмоқда. Купе SVJ (энг тезкор Lamborghini) базасида яратилган ва 830 от кучига эга V12 атмосфера двигатели билан жиҳозланган. Инсайдерларнинг таъкидлашича, янги гиперкар Lamborghini’нинг гибрид қисмсиз ишлаб чиқарилган ўн икки цилиндрли сўнгги модели бўлиб қолади. Тиражи 40 донадан ошмайдиган модел йил охирига қадар оммага тақдим этилади.
Одатда Squadra Corsa Lamborghini Super Trofeo чемпионати учун машиналар яратишга жавоб беради, бироқ бўлинманинг моделлари орасида оддий йўлга мўлжалланган суперкар ҳам мавжуд. Бу турдаги биринчи ва ягона лойиҳа — SC18. Купе махсус буюртма асосида яратилган бўлиб, унга Aventador SVJ’дан 770 от кучига эга 6,5 литрли V12 атмосфера двигатели ўрнатилган.
Lamborghini SC18.
Фото: Motor
