Уч млн евролик машина. Aston Martin гиперкари илк бор синовдан ўтказилди

Aston Martin компанияси Valkyrie гиперкари синовдан ўтказилаётганини эслатиб қўйиш учун унинг бир қатор суратларини эълон қилди, деб хабар беради «NV.ua».

Ушбу гиперкарларни харидорларга етказиб бериш 2020 йилнинг иккинчи чорагидан бошланади. Valkyrie тиражи чекланган: ишқибозлар кўп бўлишига қарамай, Aston Martin 150 та машина ишлаб чиқаришни режалаштирган (25 дона АМR Pro купеси ҳам шунинг ичида).

Aston Martin раҳбари Энди Палмернинг маълум қилишича, компания гиперкар нархи 3 миллион евро турса-да 900 нусха Valkyrie йиға олишини маълум қилган.

Aston Martin Valkyrie 1014 от кучига эга 6,5 литрли V12 Cosworth двигатели билан жиҳозланган бўлиб, айланувчи моментлар сони дақиқасига 11 мингга тенг. Шунингдек, машина электромотор билан ҳам жиҳозланган.

Бу каби қарорнинг ўзига яраша ёмон томони ҳам бор: моторни ҳар 100 минг километр масофа босиб ўтилганидан кейин таъмирлаш керак бўлади. Valkyrie эгалари цилиндрлар блоки ёрилган-ёрилмаганини текширтириш учун сервис станцияларига мурожаат қилишлари лозим.

Бундан ташқари поршен ва клапанларни ҳам мунтазам алмаштириб туриш керак.