Сурхондарёда яна бир бандлик агентлигининг фирибгарлиги фош этилди. Бу ҳақда «Дарё»га Бош прокуратура матбуот хизмати хабар берди.
Фото: «Дарё»
Департаментнинг Сурхондарё вилоят бошқармаси томонидан ўтказилган терговга қадар текширувда «И.Ж.О.» хусусий бандлик агентлиги МЧЖ раҳбари Ш.А. ва бошқалар 2019 йил давомида фуқароларнинг ишончини суиистеъмол қилгани аниқланган.
Улар Дания ва Швейцария давлатларига ишга юбориш учун 61 нафар фуқаронинг ҳар биридан 45 миллион сўмдан жами 2,6 миллиард сўмни жамиятнинг банк ҳисоб рақамига ўтказдирган. Аммо ишга юбормасдан фуқароларнинг манфаатларига жуда кўп миқдорда зарар етказган.
Бундан ташқари, жамиятга алоқадор шахслар 2019 йилнинг июль ойида Кореяга ишга юбориш важи билан 4 нафар фуқароларнинг 16 500 доллар ҳамда 125 миллион сўм пулларини фирибгарлик йўли билан қўлга киритиб, ўзларининг шахсий эҳтиёжларига ишлатиб юборгани аниқланган.
Мазкур ҳолат юзасидан «И.Ж.О.» хусусий бандлик агентлиги МЧЖ раҳбари Ш.А. ва бошқаларга нисбатан Жиноят кодексининг тегишли моддаси билан жиноят иши қўзғатилиб, тергов ҳаракатлари ўтказилмоқда.
2019 йил октябрь ойида Бандлик ва меҳнат муносабатлари вазирлиги Korean and migrations хусусий бандлик агентлиги МЧЖга берилган Ўзбекистон фуқароларини хорижда ишга жойлаштириш фаолияти билан шуғулланишга рухсат этувчи лицензия тўхтатилгани ҳамда шу йили ноябрда Ўзбекистонда фирибгарликда гумонланаётган Жанубий Корея фуқаросига жиноят иши қўзғатилгани ҳақида хабарлар берилган, ушбу жиноий иши бўйича тергов тафсилотлари маълум қилинганди.
Январь ойида эса «О.» хусусий бандлик агентлиги Кореяда ишлаш орзусидаги фуқароларни 35 минг долларга чув туширгани аниқланган, Меҳнат вазирлиги фуқароларни Жанубий Кореяга ишга жойлаштиришга хусусий бандлик агентликларининг ваколати йўқлигини маълум қилганди.
Human хусусий бандлик агентлигидан жабр кўрганларнинг эса пуллари қайтарилмоқда.
