Ўзбекистон Норматив-ҳуқуқий ҳужжатлар лойиҳалари муҳокамаси порталига «Ўзбекистон Республикаси ҳукуматининг айрим қарорларига ўзгартишлар ва қўшимчалар киритиш тўғрисида»ги қарор лойиҳаси жойлаштирилди.
Вазирлар Маҳкамасидаги Таълимни назорат қилиш давлат инспекцияси томонидан ишлаб чиқилган ҳужжат лойиҳаси билан Нодавлат таълим хизматлари кўрсатиш соҳасидаги фаолиятни лицензиялаш тартиби тўғрисидаги низом ва «Давлат умумий ўрта таълим муассасалари ўқувчиларини замонавий ягона мактаб формаси билан таъминлаш чора-тадбирлари тўғрисида»ги қарорларга ўзгартириш ва қўшимчалар киритиш кўзда тутилган.
Агар қарор лойиҳаси таклиф этилаётган таҳрирда қабул қилинса, нодавлат таълим хизматлари кўрсатувчи юридик шахслар ўз фаолиятини амалга оширишда таълим олувчиларнинг кийимларига қуйидагича шартлар қўйиши керак бўлади:
- турли дин ва конфессиялар ҳамда турли субмаданиятларга мансубликни акс эттирувчи элементларни (ҳижоб, кипа, кашая, хоч ва бошқалар) қўшишга ҳамда ҳуқуқни муҳофаза қилувчи органлар ходимларига хос бўлган ҳарбий ва идоравий формали кийим-бош кийиб юришга йўл қўймаслик;
- ўғил бола таълим олувчиларнинг ташкилотга танасининг очиқ қисмига татуировка туширган ёки пирсинг қилган, соқол қўйган, сочи 2-3 сантиметрдан узун бўлган ва ёрқин рангларга бўялган ҳолда келишларига;
- қиз бола таълим олувчиларнинг ташкилотга танасининг очиқ қисмига татуировка туширган ёки пирсинг қилган, сочини ёрқин рангларга бўяган, юзини кўзга ташланадиган даражада макияж қилган, қулоғига биттадан ортиқ сирға таққан, бармоқларига узук таққан, қўл тирноқларини бўяган ва узун қилиб ўстирган ҳолда келишига йўл қўймаслик.
Давлат умумий ўрта таълим муассасалари ўқувчилари учун замонавий ягона мактаб формасини жорий этиш тартиби тўғрисидаги низомга киритилаётган ўзгартиришга кўра, ўқувчиларнинг давлат умумий ўрта таълим муассасасига белгиланган шакллардаги мактаб формасида келиши ихтиёрий, 2024/2025-ўқув йилидан бошлаб эса мажбурий ҳисобланади. Айнан шу қоида, қарор лойиҳасига кўра, нодавлат таълим ташкилотлари таълим олувчилари учун тавсиявий бўлиши кутилмоқда.
