Мудофаа вазирлиги Жануби-ғарбий махсус ҳарбий округга қарашли «Нуристон» полигонида Нуристон гарнизонидаги ҳарбий хизматчилар иштирокида амалий машғулотлар ўтказилди. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.
Режага мувофиқ, жанговар гуруҳ тезкор ҳаракатланиб, белгиланган нуқтага етиб келиши билан биринчи синовни қарши олди. Шартли душман ўрнашиб олган ҳудудга элтувчи йўлда оммавий қирғин қуроллари қўлланилгани боис шахсий таркиб снайперлар гуруҳининг кузатуви ва ҳимояси остида зудлик билан шахсий ҳимоя воситаларини кийди. Бу заҳарланган ҳудуддан шартли душман ўрнашиб олган нуқтага қадар етиб бориш ва уни тор-мор келтириш йўлидаги муҳим қадам бўлди.
Шундан сўнг, ҳарбий хизматчилар жанговар иккилик тактик гуруҳларига бўлинган ҳолда ҳаракатни давом эттирди. Уларни шартли душман билан юзма-юз бўлиши олдидан иккинчи синов тўсиғи – чаққонлик ва эпчилликни талаб этадиган симли йўлак кутиб турарди. Тактик гуруҳлар ўзаро ички навбатчи кузатуви асосида бу тўсиқдан ҳам муваффақиятли ўтиб олди. Ҳарбий хизматчилар шу тариқа тактик тайёргарликнинг бир нечта меъёрларини ҳам аъло даражада бажарди. Шартли душман яксон этилди.
Куннинг иккинчи ярмида шахсий таркиб «Мерганлар марраси» йўлаги бўйлаб ҳаракат қилди. Улар ўқ отиш нуқтасига етиб келгунча ушбу йўлакнинг бир-биридан мураккаб, турли-туман тўсиқларини енгиб ўтди.
Шу тариқа амалий машғулотларда ҳарбий хизматчиларнинг жанговар маҳорати, сабр-тоқати ва чидамлилиги яна бир бор синовдан ўтди.
Изоҳ (0)