Наманган вилоятида ўтган йил мобайнида аёллар иштирокида содир этилган ҳуқуқбузарликлар 6599 тани ташкил этиб, 2018 йилга нисбатан 383 тага ёки 6,2 фоизга кўпайган. Бу ҳақда журналистлар учун ташкил этилган матбуот анжумани чоғида вилоят маъмурий суди раиси Салоҳиддин Турсунов маълум қилди, дея хабар беради «Дарё» мухбири.
Суд раисининг қайд этишича, ушбу ҳуқуқбузарликларнинг 21,8 фоизини ҳақорат қилиш, 21,9 фоизини майда безорилик, 11,6 фоизини эса енгил тан жароҳати етказиш билан боғлиқ ҳолатлар ташкил этган.
Масалан, ўтган йил декабрь ойида Наманган туманида яшовчи аёл яшаш хонадонида келини билан гап тортишиб қолганидан сўнг уни уриб, енгил тан жароҳати етказади. Келиннинг отаси қизидан хабар олиш учун борганида юзини кўкарганини кўриб, дарров шифохонага олиб боради ва туман ИИБга мурожаат қилади.
Маълум бўлишича, аёл олдинроқ ҳам келинини уриб, қовурғасини синдириб қўйган экан. Туман маъмурий суди ушбу ишни кўриб чиқиб, унга нисбатан жарима жазоси тайинлаган.
Вилоят маъмурий судининг якунланган йилдаги амалиётида ижобий кўрсаткичлар ҳам кузатилган. Жумладан, ўтган йили вояга етмаганлар иштирокида содир этилган ҳуқуқбузарликлар 2018 йилга нисбатан 63 тага ёки 38,5 фоизга камайган. Бунда маъмурий судларнинг Ёшлар иттифоқи маҳаллий кенгашлари билан тиғиз ҳамкорлиги салмоқли таъсирини кўрсатган.
Изоҳ (0)