Ўзбекистон ташқи ишлар вазири биринчи ўринбосари Илҳом Неъматов Россиянинг «РИА Новости» агентлигига берган катта интервьюсида мамлакатнинг ОДКБ таркибига қайтиши ҳақидаги саволга ҳам жавоб берди.
Агентлик мухбирининг: «Ўзбекистоннинг ОДКБга қайтиши эҳтимоли борми?», мазмунидаги саволига жавоб бераркан, Неъматов ҳозирча бундай гап-сўзлар йўқлигини таъкидлаган.
«Ҳозир, мен шундай кўряпман, бу борада ҳеч қандай гап-сўз йўқ. Кўриб турганингиздек, Евросиё иқтисодий иттифоқи бўйича жуда катта гап, катта муҳокамалар бўляпти, турфа фикрлар янграмоқда. ОДКБ бўйича эса ҳозирча ҳеч қандай гап-сўз эшитганим йўқ», — деди Илҳом Неъматов.Коллектив хавфсизлик шартномаси ташкилоти (ОДКБ) аъзо малмакатларнинг ҳудудий-иқтисодий маконини ҳар қандай ҳарбий-сиёсий тажовузлар, халқаро террорчилар ва йирик табиий офатлардан армиялар ва қўшимча бўлинмаларнинг биргаликдаги саъй-ҳаракатлари билан муҳофаза қилишни мақсад қилган минтақавий халқаро тузилмадир.
Ташкилотга 1992 йил 15 май куни Тошкентда Арманистон, Қозоғистон, Қирғизистон, Россия, Тожикистон ва Ўзбекистон томонидан имзоланган Коллектив хавфизлик тўғрисидаги шартнома билан асос солинган. Кейинчалик шартномага Озарбайжон (1993 йилдан 1999 йилгача), Грузия (1993 йилдан 1999 йилгача) ва Беларусь қўшилган.
Ўзбекистон ўтган вақт давомида ОДКБ таркибидан икки марта чиқиб кетган — дастлаб 1999 йил 2 апрелида (Грузия ва Озарбайжон билан бирга), кейин 2012 йил 28 июнида (ташкилотга 2006 йил августид қайта қўшилган). Ташқи ишлар вазирлигининг 2012 йил июнидаги баёнотида шартномадан чиқишнинг аниқ сабаб ва омиллари ташкилот котибиятига маълум қилингани айтилган эди.
Қайд этиш жоиз, Ўзбекистон ташқи ишлар вазири Абдулазиз Комилов 2017 йили Ўзбекистон ОДКБга қайта аъзо бўлмаслигини маълум қилган эди. Ўшанда вазир Ўзбекистон ўзининг ҳеч қандай ҳарбий ёки сиёсий блокларга қўшилмаслик концепциясига содиқ қолишини таъкидлаган эди.
Мавзуга доир: Ўзбекистон «ОДКБ»га қайта қўшилмайди
Изоҳ (0)