АПЛ. «Челси» сафарда мағлуб бўлди, «Ливерпуль» ва «Тоттенҳэм»да эса йирик ғалаба (видео)

Футбол бўйича Англия Премьер лигасининг 16-тури доирасида 7 декабрь, шанба куни 4 та учрашув бўлиб ўтди.

Фрэнк Лэмпард қўл остидаги Лондоннинг «Челси» клуби сафарда «Эвертон»га қарши майдонга тушди.

Беллашувнинг 5-дақиқасидаёқ мезбон жамоа ярим ҳимоячиси Ришарлисон ҳисобни очган бўлса, 49-дақиқага келиб мерсисайдликлар ҳужумчиси Доминик Кэлверт-Льюин ҳсиобни 2:0 кўринишига олиб келди. Орадан 3 дақиқа ўтиб эса «аристократлар» вакили Матео Ковачич ҳисобни қисқартирди (2:1). «Эвертон»нинг 3-голига Кэлверт-Льюин 84-дақиқада муаллифлик қилиб, дублга эришди.

Шу тариқа Лондон клуби сафарда кечган баҳсда «Эвертон»га 1:3 ҳисобида имкониятни бой бериб қўйди ва очко йўқотди.

Маълумот учун, «Челси» 29 очко жамғарган ҳолда мусобақа жадвалида 4-ўринда бормоқда. «Эвертон» эса 17 очко билан 14-поғонага кўтарилди.

Шу куни Юрген Клопп бошлиқ «Ливерпуль» меҳмонда «Борнмут»ни синовдан ўтказди.

Ўйин давомида Мерсисайд клуби аъзолари Алекс Окслейд-Чемберлен (35), Наби Кейта (44) ҳамда Муҳаммад Салоҳ (54) ўз ҳисобига биттадан голни ёздириб қўйди.

Натижада «Ливерпуль» сафарда «Борнмут»ни йирик 3:0 ҳисобида мағлубиятга учратди ва навбатдаги 3 очкога эга бўлди.

Қайд этиш жоиз, мусобақа жадвалида пешқадамлик қилаётган «қизиллар» очколари сонини 46 тага етказди. «Борнмут» эса 16 очко тўплаб 15-ўринни банд қилиб турибди.

Жозе Моуриньо бошқарувидаги Лондоннинг «Тоттенҳэм» жамоаси эса ўз майдонида «Бёрнли»ни қабул қилди.

Учрашувда Лондон клуби ҳужумчиси Ҳарри Кейн (4, 54) дублга эришган бўлса, Лукас Моура (9), Сон Ҳён Мин (32) ва Мусса Сиссоко (74) биттадан голга муаллифлик қилди.

Шу тариқа «шпорлар» ўз уйида кечган баҳсда «Бёрнли» дарвозасига жавобсиз 5 та гол уриб, йирик ҳисобдаги ғалабани нишонлади (5:0).

Ушбу ғалабадан сўнг «Тоттенҳэм»нинг очкоси 23 тага етди ва жамоа мусобақа жадвалида 5-ўринга кўтарилди. «Бёрнли» эса 18 очко билан 13-поғонда бормоқда.