Туркия Ўзбекистон билан ҳарбий операциялар ўтказиш борасидаги тажрибаларини ўртоқлашди
Ўзбекистон Қуролли Кучлари академиясида «Туркия Қуролли Кучларини замонавий ҳарбий можароларда, Афғонистон ва Яқин Шарқда юзага келаётган вазият шароитида қўллаш тажрибаси» мавзусида халқаро ҳарбий-илмий анжуман ўтказилди. Бу ҳақда Мудофаа вазирлиги матбуот хизмати маълум қилди.
Унда ҳар икки мамлакат Мудофаа вазирликлари масъул зобитлари, Ўзбекистон Қуролли Кучлари академияси, Туркия Миллий мудофаа университети вакиллари, профессор-ўқитувчилар иштирок этди.
Туркия билан икки томонлама ҳамкорлик режасига мувофиқ ташкил этилган ушбу тадбирнинг асосий мақсади замонавий ҳарбий можароларнинг хусусиятлари бўйича маълумот ва фикр алмашиш учун майдон яратиш, уларда Қуролли Кучлар бўлинмаларини Туркия армияси мисолида қўллаш тажрибасини ўрганишдан иборат.
Анжуманда дунёда ва минтақада юзага келаётган ҳарбий-сиёсий вазият, Марказий Осиёдаги минтақавий ҳамкорлик ҳамда замонавий ҳарбий можароларда Туркия Қуролли Кучларини қўллаш тажрибаси, ҳарбий машғулотлар мобайнида қўшинларни бошқариш, уларнинг ҳар томонлама таъминоти ва жанговар тайёргарлик тизимини такомиллаштиришга доир маърузалар тингланди.
Шунингдек, Туркия вакиллари билан икки томонлама учрашув ўтказилиб, унда икки мамлакат олий ҳарбий таълим муассасаларида ҳарбий кадрлар тайёрлаш ва педагогик фаолият бўйича тажриба алмашиш масалалари бўйича ҳамкорлик истиқболлари муҳокама қилинди.
Ялпи мажлисдан сўнг анжуман иши мавзувий шўбаларга бўлинган ҳолда давом этди. Иштирокчилар ҳарбий бошқарув тизими ва уларнинг жанговар ҳаракатлардаги таъминотини ташкиллаштириш бўйича тажриба алмашди.
