Колумнистимиз Сарвар уста энди жаҳоншумул масалаларга ортиқ аралашмасдан, газ-электр-кўмир каби «ходовой» мавзуларда ёзиб юрмоқчи. Қиш фасли борки, ўзбеклар учун ўлмайдиган муаммо ҳақида ёзишга нима етсин.
Кириб келди олтин куз, газ-светдан умид уз. Қишни бу юрт қувонч эмас, ташвиш билан кутишга кўникди, кўниктиришди. Газ қазиб чиқариш бўйича дунёда етакчилар сафида эканимиз бугун истеҳзо уйғотувчи иборага айланди. Бу ҳолдан чиқишнинг чораси борми?
Коллаж: «Дарё»
Совет рангли телевизорлари тез-тез бузилиб, яхши кўрсатмасди. Латифалар тўқилган: «Дада, нега бизнинг телевизоримиз кўрсатмайди?», «Чунки бизники рангли-да». Хўш, нега ўзбеклар газга муҳтож? Чунки бизда газ конлари кўп-да.
Улар халқники эмаслиги ҳақида индамаймиз, майли. Хўш, бизда газ кони кўп экан – бу яхши. Бу газ камбағалларга берилмас экан – бунисига ҳам кўникдик. Нима қилиш мумкин? Жавоб оддий – четдан сотиб олиш. Қозоғистонда суюлтирилган пропан газининг литри 20 сент атрофида (икки минг сўм), бизда қарийб икки баравар қиммат. Қувурдан келувчи табиий газ нархлари орасидаги фарқ ҳам тахминан шунча. Қозоғистон ёки Туркманистондан қувур тортамиз. Каттакон цистерналарда суюлтирилган газ сотиб оламиз. Тадбиркорлар қотириб ташлайди, давлат акамиз божни ошириб қўймаса бўлди. Энг қизиғи, гази бўлатуриб қўшнисидан газ сотиб олиб уйини иситган ноёб мамлакат сифатида ном тарқатамиз. Буғдой экиб, унни Қозоғистондан импорт қилишда (ўзимизники молга) тажрибамиз бор. Энди газ импортига навбат. Россия ҳам чексиз гази бўлатуриб Ўзбекистондан газ олади. Улардан кам жойимиз борми?
Соғломга касалхона, беморга микрофон
Қизиқ тенденцияни сезяпсизми? Соғломлар касалхонада, синдромга учраганлар эса юлдуз.
Бир аёл кўчага чиқиб юрганди. Битта ўзи эмас, одамлар билан бирга. Онлайн трансляция қилган, айримларга ёқимсиз гаплар айтган. Ҳозир жиннихонага жойланган.
Кап-катта одам ўзга сайёрада меҳмон бўлиб келганини ҳикоя қиляпти. Ўзидан ўзи табиб бўлиб қолгани-ю, «уёқда» қирқта фарзанди борлигини айтиб қулоғимизга тепяпти. Соғлом одам шундай дейдими? Аммо унинг атрофида мухбирлар гирдикапалак. Телевизор-у сайтлар ундан бўшамайди.
«Биз кутгандик, билгандик» иборалари билан машҳур ижодкорнинг қайтиши Андижонда бўлди. «Андижонда туғилишни орзу қилган» қизалоқни кўплар танқид қилди, аммо шифокор «Бу психологияда ўрганилган тиббий синдром» дея ёрдам беришга чақирди. Қизиқ дунё.
Одам юлдузликни орзу қилишга ҳам қўрқади.
Сарвар уста
Муаллиф фикри таҳририят нуқтаи назаридан фарқ қилиши мумкин.
