Жорий йилнинг 5 ноябрь куни «Ўзелтехсаноат» уюшмаси билан ҳамкорликда «Кооперация куни» кўргазмаси ўтказилди. Кўргазма «Ўзелтехсаноат» ташаббуси билан уюштирилди ва Artel Роҳат ишлаб чиқариш базасида ўтказилди.

«Кооперация куни» кўргазмасининг асосий мақсади кабел ва сим, маиший техника ва электротехника каби соҳаларда маҳсулот ишлаб чиқарувчи корхоналарни билраштирган ҳолда кооперация тузиш ва маҳаллий хом ашё ва эҳтиёт қисмлардан самарали фойдаланиб, ишлаб чиқаришни маҳаллийлаштиришдир. Кўргазмада Artel, CП АО «Андижон кабел», АО «Фотон», АО «Чирчиқ трансформатор завод», ООО «Қўқон тех инвест», ООО «Элхолдинг» каби корхоналар иштирок этди.

«Кооперация куни» кўргазмасида Artel компанияси ва бошқа қатнашчи корхоналар томонидан яратилган эҳтиёт қисмлар тақдим этилди. Кўргазма қатнашчилари бир-бири билан қандай маҳсулот ишлаб чиқариши ҳақида маълумот алмашиши ва ҳамкорликда маҳсулот ишлаб чиқариш учун кооперация тузиш масаласини муҳокама қилиш учун кенг имкониятлар яратилди.

Кўргазмада муҳокама қилинган мавзулар Ўзбекистон Республикаси Президенти Шавкат Мирзиёевнинг жорий йилнинг 1 майдаги «Саноат кооперациясини янада ривожлантириш ва талаб юқори бўлган маҳсулотларни ишлаб чиқаришни кенгайтириш чора-тадбирлари тўғрисида»ги қарорини амалга оширилишига ўз ҳиссасини қўшади. Саноат кооперацияси тузилиши Ўзбекистон Республикаси иқтисодини ривожлантиришда ҳамда муҳим реформалар киритишда ва чет эл давлатлари маҳсулотлари билан бемалол рақобатлаша оладиган юқори сифатли маҳсулот ишлаб чиқаришни йўлга қўйишда муҳим рол ўйнайди десак, ҳеч муболаға бўлмайди.

Ушбу қарорнинг самарали амалга оширилиши нафақат мамлакат ички, балки ташқи иқтисодиётини ҳам жадал ривожланишига ҳисса қўшади. Бундан ташқари, ушбу лойиҳанинг амалга оширилиши янги ишлаб чиқариш базаларининг пайдо бўлиши ва янги иш жойларининг жорий этилишига олиб келади.

«Кооперация куни» кўргазмасида қатнашган корхоналар маҳаллий маҳсулотларни фаол ишлаб чиқаришни йўлга қўйиш ва юртимиз экспорт салоҳиятини фаол ривожлантириш каби вазифаларни бажаришни ўзларига мақсад қилиб қўйган.

Маҳаллий ва хорижий бозорларда талаб юқори бўлган маҳсулотлар ишлаб чиқариш учун саноатда кооперация алоқаларини ривожлантириш эса хўжалик юритувчи субъектлар ўртасида ўзаро ҳамкорлик учун қулай шарт-шароитлар яратади ва мамлакатимиз иқтисодиётини жадал ривожланишига туртки бўлади.

Реклама ҳуқуқи асосида.